धनगढी २१ फागुन – नेपाली कांग्रेसका सभापति शेरबहादुर देउवाले कोरोना भाइरस संक्रमणबाट जोगिन उच्त सतर्कता अपनाउनुपर्ने बताएका छन् । उनले सकभर हात नमिलाउन पनि आग्रह गरे।

नेपाल प्रेस युनियन कैलालीले धनगढीमा बुधबार आयोजित पत्रकार सम्मेलनमा देउवाले भने, ‘कोरोनाभाइरस नेपालमा पनि आउन सक्ने संभावना छ। यो डरलाग्दो, खतरनाक रोग रहेछ। भरसक हात नमिलाउने। बरू नमस्ते गर्ने, हामी त जय नेपाल गर्छौं।’ उनले प्रधानमन्त्री केपी शर्मा ओलीको शीघ्र स्वास्थ्य लाभको कामना गरे। प्रधानमन्त्री केपी शर्मा ओलीको आज त्रिवि शिक्षण अस्पतालमा मिर्गौला प्रत्यारोपण भइरहेको छ।

देउवाले प्रजातन्त्र विरोधी काम भए विरोध गर्ने बताए। स्थानीय तहमा भ्रष्टाचार बढेको उनले आरोप लगाए। पूर्व प्रधानमन्त्री एबम् नेपाली काग्रेसका सभापति शेर बहादुर देउवाले मिलेनियम च्यालेन्ज कर्पोरेशन (एमसीसी) जस्ताको त्यस्तै पारित हुनुपर्ने बताएका छन् । ‘यति धेरै रकम अहिलेसम्म नेपालमा आएको थिएन। जस्ताको त्यस्तै पारित गर्नुपर्छ। ढिलो भइसक्यो,’ देउवाले भने। सुदुरपश्चिम प्रदेश सरकारले केही काम गर्न नसकेको आरोप उनले लगाए। आफ्नो चार वर्षे सभापतिको कार्यकाल सफल भएको देउवाको भनाइ छ।

सुदूरपश्चिम प्रदेश सरकारको कामलाई कसरी हेरिरहनुभएको छ भन्ने पत्रकारको प्रश्नमा देउवाले प्रदेश सरकारले केहि काम गर्न नसकेको बताए । प्रदेश सरकार गठन भएदेखी आज सम्म प्रदेश सरकारले झनै कुनै  काम गर्न नसकेको उनले बताए । उनले सुदूरपश्चिमको विकासका लागि पश्चिम सेती, गौरीफन्टा नाका ,सुख्खा बन्दरगाह लगायतका योजनाहरुलाई प्राथामिकतामा राखिनुपर्ने बताए । सभापति देउवाले नेपाली काग्रेसको आगामी महादिवेशन तोकिएको समयमा नै हुने उनले दाबी गरे ।