बझाङ । माघ महिनाको अन्तिम सातादेखि पर्न सुरु भएको हिमपातका कारण बझाङमा ठुलो क्षति भएको छ । लगातार ४ पटक परेको हिमपातका कारण सुर्मा गाउँपालिका २ जनाको मृत्यु भएका छ भने एघार सय भन्दाबढी पशु चौपाया मरेका छन् ।

हिमपातका कारण सबै भन्दा बढी साईपाल गाउँपालिकामा क्षति भएको छ । साईपाल गाउँपालिका भरी एक जार ७ सय भन्दा बढी भेडा च्यांग्रा नै मरेका साईपाल गाउँपालिकाका अध्यक्ष राजेन्द्र बहादुर धामीले बताए । झण्डै यहाँ तिन सय परिवारले भेडा च्याङ्ग्रा पालेका छन् । बाक्लो हिमपात भएपछि एक करोड ३ लाख बरबरका भेडा, च्याङग्राहरु मरेका छन् भने गाउँपालिकाले वितरण गरेका ६ लाख ५० हजार बराबरका विभिन्न जातका फलफुलका बोटहरुमा नोक्सान पुगेको छ । गाउँपालिका भरी एक करोड ९ लाख ५० हजार मुल्य बराबरको नोक्सान भएको धामीले बताए ।

यस्तै जिल्लाको तल्कोट गाउँपालिकामा २२ लाख ५० हजार मुल्य बराबरको नोक्सान भएको गाउँपालिकाका अध्यक्ष लाल बहादुर विष्टले जानकारी दिए । हिमपातका कारण दाँतोली गाड लघुजल विद्युत आयोजना र मल्लो सुगाड लघु जलविद्युत योजनाका पोलहरु ढलेर १५ लाख बराबरको नोक्सान भएको छ । अहिले विद्युत सेवा पुर्ण रुपमा अबरुद्ध भएको उनले बताए । गाउँपालिकाले वितरण गरेका ३० भन्दा बढी टर्नेल हाउसहरु पुर्ण रुपमा क्षति पुगेको जसबाट ७ लाख ५० हजार बराबरको क्षति भएको विष्टले जानकारी दिए ।

यता खप्तड छान्ना गाउँपलिका भरी एक करोड २ लाख ३५ हजार मुल्य बराबरको नोक्सान गरेको छ । एकै पटक बाक्लो हिउँ परेका कारण गाउँपालिकाबाट वितरण गरिका २ सय ८ भन्दा बढी टर्नेल हाउस भत्केका छन् भने विभिन्न ठाँउमा विद्युतका पोलहरु भाँचिएको र गाउँपालिकाले वितरण गरेका दाँते ओखर, कागती, केराका बोटलगायतका फलफुहरु पुर्ण रुपमा नष्ट गरी दिएको गाउँपालिकाका अध्यक्ष वर्क बहादुर रोकायाले बताए ।

अधिकांश फलफुलका बोटहरु काम नलाग्ने गरेर भाँचिएका उनले बताए । आफु समेत किसान भएको बताउँदै उनले आफ्नो मात्रै २५।३० लाख बराबरको नोक्सान हिमपातले गरेको बताए । गाउँपालिका भरी कति क्षति भयो भन्ने कुराको डाटा आई सकेको उनले जानकारी दिए । जिल्ला भरिमा सबै भन्दा कम क्षति जयपृथ्वी नगरपालिकामा भएको छ । विभिन्न प्रजातीका कागती अमिलो लागतका फलफुहरु र टर्नेलहरु गरेर जम्मा ५ लाख मुल्य बराबरको मात्रै क्षति भएको तर तथ्याङ्क लिने काम नसकिएको जयपृथ्वी नगरपालिकाका कृर्षि संयोजक राम बहादुर खड्काले बताए ।

नगरपालिकाको तल्लो क्षेत्रमा कम हिउँ पर्ने भएका कारण माथिल्लो क्षेत्रमा मात्रै हिउँले क्षति पुगाएको उनले बताए । मष्टा गाउँपालिमा ४१ लाखको क्षति भएको छ । ३० लाख मुल्य बराबरका टर्नेलहरुमा क्षति पुगेको छ भने ६ लाख मुल्य बराबरका फलफुहरु र ५ लाख मुल्य बराबरको विद्युतका पोल तथा तारहरु नोक्सान पुगकेको गाउँपालिकाका अध्यक्ष कर्ण बहादुर कठायतले बताए ।

यता सुर्मा गाउँपालिकामा भने २ जना युवाको हिउँमा पुरिएर मृत्यु भएको सुर्मा गाउँपालिका वडा नम्बर एकका वडा अध्यक्ष पुस्कल बहादुर बोहराले जानकारी दिए । अन्य क्षतिमा गाउँपालिकाबाट अनुदानमा वितरण गरीएका १८ लाख ७५ हजार मुल्य बराबरका टर्नेलहरु, २ लाख २५ हजार मुल्य बराबरका पशु चौपाय तथा भेडा, बाख्रा मरेको उनले बताए ।

थलारा गाउँपालिकामा फलफुल तथा तरकारी खती टर्नेल हाउस लगाएर जम्मा १० लाख मुल्य बराबरको क्षति भएको गाउँपालिकाका अध्यक्ष भुवनेश्वर उपाध्यायले जानकारी दिए । दुर्गाथली गाउँपालिकामा समेत जुईली गाड दोस्रो हाईड्रो पावरका पोलहरु भाँचिएका र २ वटा घर भत्किएको, गाउँपालिकाबाट वितरण गरिएका टर्नेल हावससंगै विभिन्न प्रजातिका फलफुलहरु नोक्सान हुँदा ३० लाख मुल्य बराबरको क्षति भएको भएको गाउँपालिकाका अध्यक्ष प्रयागराज जोशीले जानकारी दिए ।

केदार स्युँ गाउँपालिकाका अध्यक्ष ईन्द्र बहादुर भण्डारीका अनुसार गाउँपालिकाको वडा नम्बर २,३,५,६,७ मा हिउपातका कारण फलफुल तथा अन्नबाली लगाएर १७ लाख मुल्य बराबरको क्षति गरेको जानकारी दिए । बुंगल नगरपालिकाको वडा नम्बर ४ र ५ बाहेक अन्य ठाँउमा हिउँले १५ लाख ६५ हजार मुल्य बराबरको क्षति पुगेको छ । जिल्लाको छविसपाथिभेरा गाउँपालिकामा समेत हिमपातले झण्डै एक करोड मुल्य बराबरको क्षति गरेको गाउँपालिकाका अध्यक्ष अक्कल बहादुर धामीले बताए । सबै भन्दा बढी क्षति कृर्षि क्षेत्रमा भएको उनको भनाई छ । फलफुलका बोटहरु ढलेका र गाउँपालिकाले वितरण गरेका सबै फलामे टर्नेलहरु भाँचिएर काम नलाग्ने आवस्थामा पुगेको उनको भनाई छ । यस्तै विथ्थडचिर गाउँपालिकामा समेत हिमपातले क्षती गरेको गाउँपालिकाले जनाएको छ ।

यता जिल्ला प्रशासन कार्यालयमा भने सो कुराको तथ्याङ्क नभएको तर २ जनाको हिमपातका कारण मृत्यु भएको प्रमुख जिल्ला अधिकारी उमेश पाण्डेले बताए । अहिले सबै स्थानीय तहबाट हिमपातले कुन ठाँउमा कति क्षति गरेको छ सो कुराको विवरण लिने काम भैरहेको उनले जानकारी दिए ।