धनगढी,२ साउन । हेमा श्री फाउन्डेसनले गौरीगङ्गाको एक विद्यालयमा शैक्षिक सामाग्री वितरण गरिएको छ । हेमा श्री फाउन्डेसन नेपाल अध्यक्ष तथा समाजसेवी मञ्जु पौड्याल (हेमा श्री)ले आज जन्मदिनको अवसरमा गौरीगङ्गा–४,राजिपुरस्थित श्री कालिका माध्यमिक विद्यालयमा शैक्षिक सामाग्री वितरण गरिएको हो ।

जन्मदिनको नाममा विभिन्न फजुल खर्च गर्नुभन्दा आफ्नो क्षमता अनुसार समाजसेवा गर्न निकै उचित हुने भएकोले सो विद्यालयमा अध्ययनरत विपन्न,आर्थिक अवस्था न्यून,एकल परिवारका ३० जना बिद्यार्थीहरुलाई शैक्षिक सामाग्री वितरण गरिएको फाउन्डेसनकी अध्यक्ष मञ्जु पौड्याल(हेमा श्री) ले बताएकी छन् ।

विगतका दिनहरूमा पनि सामुदायिक विद्यालयलाई सहयोग गर्दै आइरहेको र आउँदा दिनहरूमा पनि सामुदायिक विद्यालयहरूमा शैक्षिक सामाग्री,बिद्यार्थीहरुलाई पोसाक वितरण गर्ने,बालबालिका लागि अनाथालय तथा ज्येष्ठ नागरिक संरक्षण कार्य गर्ने भावी योजना रहेको फाउन्डेसनका कार्यवाहक अध्यक्ष हेमन्त राज जोशी (बाजे)ले बताए ।

कापी,कलम र झोला शैक्षिक सामाग्री पाएकोमा बिद्यार्थीहरु निक्कै हर्षित भएका थिए भने विद्यालय व्यवस्थापन समिति अध्यक्ष दिनेश बहादुर खडकाले आर्थिक स्थिति निकै कमजोर भएका सामुदायिक विद्यालयमा अध्ययन गर्न आउने बिद्यार्थीहरुलाई आफ्नो जन्मदिनको अवसरमा शैक्षिक सामाग्री वितरण गरेकोमा हेमा श्री फाउन्डेसन नेपाल परिवार तथा अध्यक्ष मञ्जु पौड्याल लाई धन्यवाद व्यक्त गर्नु भएको थियो ।

विद्यालय व्यवस्थापन समिति अध्यक्ष दिनेश बहादुर खडकाको अध्यक्षतामा सम्पन्न उक्त कार्यक्रमका प्रमुख अतिथि वडा अध्यक्ष राम बहादुर चौधरी,त्रिवेणी सामुदायिक बन अध्यक्ष प्रकाश साउँद,पूर्व विद्यालय अध्यक्ष गङ्गाराम देवकोटा,अभिभावक सङ्घ अध्यक्ष भीम बहादुर शाही,युवा व्यवसायी अमित चन्द,विनोद श्रेष्ठ,करन साउँद, शिक्षक–शिक्षिका,फाउन्डेसनका पदाधिकारी लगायत बिद्यार्थीहरुको उपस्थिति रहेको थियो । स्वागत सहितको शुभकामना मन्तव्य शिक्षक योगराज आचार्यले गर्नु भएको थियो भने कार्यक्रमको सञ्चालन केदार प्रसाद शर्माले गर्नु भएको थियो ।