धनगढी, ११ जेष्ठ / कैलालीमा प्रादेशिक नीतिनिर्माण प्रक्रियामा अतिसिमान्तकृत तथा न्यून प्रतिनिधित्व रहेका समुदायको अर्थपूर्ण सहभागिता र प्रतिनिधित्वको सवाल विषयक अन्तरक्रिया कार्यक्रम गरिएको छ ‌ । सुदुरपश्चिम स्तरीय बहुसरोकारवाला निकायहरुको सञ्जालको आयोजनामा अन्तरक्रिया कार्यक्रम गरिएको हो।

“हाम्रो आवाज, हाम्रो समावेशिता , प्रादेशिक नीतिनिर्माण प्रक्रियामा हाम्रो अर्थपूर्ण सहभागिता”भन्ने मूल नारालाई आत्मसात गरी धनगढीको आस्था होटेलको सभाहलमा कार्यक्रम गरिएको राष्ट्रिय आदिवासी जनजाति अपाङ्ग महिला संघ नेपालका कैलाली जिल्ला संयोजक चन्द्रकान्त पनेरुले बताए ।

राष्ट्रिय आदिवासी जनजाति अपाङ्ग महिला संघ नेपालको सहकार्य तथा युएनपिआरपिडी र युएन ओमनको आर्थिक सहयोगमा उक्त कार्यक्रम गरिएको हो। अन्तरक्रिया कार्यक्रममा अपाङ्गता भएका अतिसिमान्तकृत र न्यून प्रतिनिधित्व रहेका समुदाय केन्द्रित प्रदेश सरकारले नीतिनिर्माण गर्नु पर्ने विषयलाई जोड दिइएको थियो। कार्यक्रममा विभिन्न समुदायको प्रतिनिधित्व हुने गरी ५० जनाको सहभागिता रहेको थियो।

कार्यक्रममा अपाङ्ग , अतिसिमान्तकृत समुदायलाई कसरी अरु सरह अधिकार दिन सकिन्छ, कस्तो नीतिनिर्माण गर्नु आवश्यक छ भन्ने बिषय केन्द्रित प्रस्तुति समेत गरिएको संयोजक पनेरुले बताए।

कार्यक्रमको अध्यक्षतामा सुदूरपश्चिम स्तरीय बहुसरोकारवाला निकायहरुको सञ्जालकी अध्यक्ष इन्द्रा दान पाली रहनु भएको थियो । यस्तै कार्यक्रममा प्रदेश सभा सदस्य डम्वरी महरा “रक्षा” र धर्मराज पाठक लगायत विविन्न सरोकारवाला निकायका पदाधिकारी तथा पत्रकारको उपस्थिति रहेको थियो।