महेन्द्रनगर २७ कार्तिक- कञ्चनपुरको बैलौरी नगरपालिकामा रहेको छोटी भन्सार कार्यालय दुई जना कार्यालय सहयोगीको भरमा चलेको छ। २०२० मा स्थापना भएको भन्सार कार्यालय सहयोगीका भरमा सञ्चालन हुँदै आएको छ। कार्यालयमा नायब सुब्बाको दरबन्दी भए पनि कैलाली भन्सार कार्यालयमा कार्यरत छन्।

कार्यालय सहयोगी तेजबहादुर मडैले नायब सुब्बा महिना÷महिना कार्यालयमा आइराख्ने बताए। ‘यहाँ आए पनि ८ र १० दिन मात्रै बस्छन।’ मडैले भने, ‘सुरक्षा व्यवस्था नहुँदा बस्नै मान्दैनन।’ कैलाली भन्सार कार्यालय मातहत रहेको छोटी भन्सार कार्यालयमा हरेक महिना कार्यालय सहयोगी पनि परिवर्तन हुने गरेको मडैले बताए। ‘हामी पनि १ गतेदेखि जान्छौ यहाँ आर्को आउँछन् हरेक महिना परिवर्तन भइराख्छ।’

दरबन्दीका कर्मचारी नबस्ने भएपछि राजस्व संकलनमा कमी आएको छ। भन्सार कार्यालयको बाटो हुँदै भारतबाट सामान आयात हुने भएपनि थोरैले मात्र राजस्व तिर्ने गरेका छन्। ‘राजस्व तिराउन पनि सजिलो छैन।’ उनले भने,‘आफै आएर काटे मात्र हो हामी रोकेर राजस्व तिराउँदैनौं।’

कार्यालयमा दुई जना सशस्त्र प्रहरीको कर्तव्य भए पनि राजस्व तिराउने हिम्मत गर्दैनन्। कार्यालयमा सुरक्षा व्यवस्था नहुदाँ समस्या भएको कार्यालय सहयोगी मडैले बताए। उनले राजस्व तिराए धम्की आउने गरेको बताए। ‘सशस्त्र प्रहरीको कर्तव्य दिनमा मात्रै हुन्छ राति हामी पनि डराउँछौं’, उनले भने। भन्सार कार्यालय सुरक्षार्थ सशस्त्र प्रहरी बिहान १० बजेदेखि साँझ ६ बजेसम्म मात्रै बस्ने भएकाले अन्य समयमा तस्करी हुने गरेको छ।

खुला सिमानाका कारण चोर बाटोबाट बढी समान तस्करी हुने गरेको कार्यालय सहयोगीले बताए। गत आर्थिक वर्षमा २ लाख ५० हजार राजस्व संकलन गरेको कार्यालय सहयोगी मडैले बताए। चालु आर्थिक वर्षको असोज मसान्तसम्म ५५ हजार राजस्व संकलन भएको छ। उनले यस नाकाबाट आयात मात्रै हुने गरेको बताए। सुरक्षा व्यवस्था र कर्मचारीको बासस्थानका लागि संरचना निर्माण भए राजस्व वृद्धि हुने उनको भनाइ छ।

अन्नपुर्ण पोष्टबाट