धनगढी , २० असोज  / धनगढीस्थित ऐश्वर्य बहुमुखी क्याम्पसबाट विज्ञानमा स्नातक (बीएस्सी) अध्ययन पूरा गरेका राजेशबहादुर मल्लले ८२ दशमलव ४ प्रतिशत अंक प्राप्त गर्दै क्याम्पस प्रथम भएका छन्।

धनगढीस्थित दुन एकेडेमीमा अध्यापन गर्दै आएका मल्लले बीएस्सीको पहिलो वर्षदेखि नै गणित तथा विज्ञान विषय अध्यापनसँगै आफ्नो उच्च शिक्षालाई निरन्तरता दिएका थिए। अध्यापनको जिम्मेवारी, नियमित कक्षा, अध्ययन तथा अनुसन्धानलाई सन्तुलित रूपमा अघि बढाउँदै उनले चार वर्षे बीएस्सी अध्ययन पूरा गरेका हुन्।

अध्यापनसँगै अध्ययनलाई निरन्तरता दिनु चुनौतीपूर्ण भए पनि निरन्तर मेहनत, समय व्यवस्थापन र लक्ष्यप्रतिको प्रतिबद्धताले सफलता हासिल गर्न सहयोग पुगेको मल्लले बताए।

“बीएस्सीको पहिलो वर्षदेखि नै अध्यापन गर्दै अध्ययनलाई अघि बढाउनु सहज थिएन। विद्यालयको जिम्मेवारी पूरा गर्दै आफ्नो पढाइमा पनि निरन्तर मेहनत गरेँ। आज प्राप्त भएको यो नतिजा मेरो मेहनतसँगै परिवार, शिक्षक तथा शुभेच्छुकहरूको साथ र हौसलाको परिणाम हो,” मल्लले भने।

मल्ल अध्ययनका क्रममा शैक्षिक गतिविधिसँगै अनुसन्धानमा समेत सक्रिय थिए। अध्यापन पेशामा रहेर उच्च शिक्षालाई निरन्तरता दिँदै उत्कृष्ट नतिजा हासिल गरेको उनको सफलतालाई अध्ययनसँगै पेशागत जिम्मेवारी निर्वाह गरिरहेका विद्यार्थी तथा युवाका लागि प्रेरणादायी उपलब्धिका रूपमा लिन सकिन्छ।

अध्यापन र अध्ययनलाई सँगसँगै अघि बढाउँदै क्याम्पसमा उत्कृष्ट नतिजा हासिल गरेका मल्लले निरन्तर मेहनत र समय व्यवस्थापनबाट अध्ययन तथा पेशागत जिम्मेवारीबीच सन्तुलन कायम गर्न सकिने बताएका छन्।