धनगढी, २० साउन / सेती प्रादेशिक अस्पतालले कार्यालय समयभित्र आफ्ना चिकित्सक तथा कर्मचारीलाई निजी स्वास्थ्य संस्था वा क्लिनिकमा सेवा दिन रोक लगाउँदै सूचना जारी गरेको २४ घण्टा पनि नबित्दै अस्पतालकै एक चिकित्सक निजी स्वास्थ्य संस्थामा भेटिएका छन्।

अस्पतालले २०८३ साउन २० गते सार्वजनिक गरेको सूचनामा कार्यालय समयभर चिकित्सक तथा कर्मचारीले अस्पतालमै उपस्थित भएर सेवाग्राहीलाई सेवा दिनुपर्ने स्पष्ट निर्देशन दिएको थियो। कार्यालय समय उल्लंघन गरी निजी स्वास्थ्य संस्थामा कार्यरत रहेको पुष्टि भए प्रचलित कानुन तथा लागू सेवा-शर्तअनुसार अनुशासनात्मक कारबाही गरिने सूचनामा उल्लेख छ।

तर सूचना जारी भएको २४ घण्टा नपुग्दै अस्पतालका सर्जन डा. विष्णुबहादुर बुढा करिब दिउँसो ३:५३ बजे सेती प्रादेशिक अस्पतालबाहेक अन्य निजी स्वास्थ्य संस्थामा भेटिएका थिए। यद्यपि सर्जन डा. बुढाले सुरुमा आफु बाहिर गएको स्विकार गर्न मानेन।

केही जानकारी सहित शोधपुछ गर्दा आफु आर्थिक लेनदेनको लागि त्यहाँ गएको स्विकार गर्दै डा. बुढाले कुनै स्वास्थ्य सेवा दिन नगएको बताएका छन्।

यस विषयमा सेती प्रादेशिक अस्पताल विकास समितिका अध्यक्ष बलराम जैसी भट्टसँग प्रतिक्रिया माग्दा उनले अस्पताल प्रशासनले जारी गरेको सूचनाको पूर्ण रूपमा पालना गर्न सबै चिकित्सक तथा कर्मचारीलाई आग्रह गरिएको बताए। “यदि कार्यालय समयमै बाहिर सेवा दिएको पुष्टि भए आवश्यक प्रक्रिया र कारबाही अघि बढाइन्छ,” उनले भने। उनले सबैलाई अस्पतालको निर्देशनको पालना गर्न पनि आग्रह गरेका छन्।

यसअघि अस्पताल प्रशासनले केही चिकित्सकहरू नियमित ड्युटी समयमै निजी क्लिनिक तथा अन्य स्वास्थ्य संस्थामा कार्यरत रहेको गुनासो आएपछि सेवाप्रवाहलाई प्रभावकारी बनाउन कडाइ गरिएको जनाएको थियो। मेडिकल सुपरिटेन्डेन्ट डा. हेमराज पाण्डेद्वारा जारी सूचनामा तोकिएको कार्यसमयभर अस्पतालमै उपस्थित भई गुणस्तरीय स्वास्थ्य सेवा दिन चिकित्सकहरूलाई निर्देशन दिइएको छ।

यस्तै मेडिकल सुपरिडेन्ट डा. पाण्डेले चिकित्सकहरूले कार्यालय समयमा बाहिर गएर सेवा दिएको प्रमाणसहित गुनासो आएमा आफूहरूले त्यस विषयमा आवश्यक कदम चाल्ने बताएका छन्।