बझाङ ४ साउन/निरन्तर वर्षा र वर्षा अझै बढ्ने मौसम पूर्वानुमानका कारण सम्भावित विपद् जोखिमलाई मध्यनजर गर्दै जिल्ला प्रशासन कार्यालय बझाङले सोमबार साँझ ७ बजेदेखि मंगलबार बिहान ७ बजेसम्म जिल्लाभित्र चल्ने तथा जिल्लाबाट बाहिरिने सबै प्रकारका सवारी साधनको आवागमन पूर्ण रूपमा बन्द गर्ने निर्णय गरेको छ।

प्रमुख जिल्ला अधिकारी मुकेश कुमार केशरीद्वारा जारी सूचनाअनुसार रातिको समयमा सवारी सञ्चालन गर्दा बाढी, पहिरो तथा सडक अवरोधका कारण दुर्घटनाको जोखिम उच्च रहने भएकाले यात्रु तथा चालकको सुरक्षालाई प्राथमिकता दिँदै अस्थायी रूपमा सवारी सञ्चालन रोकिएको हो।

प्रशासनले यस निर्णयबाट यात्रुहरूमा पर्न गएको असुविधाप्रति क्षमायाचना गर्दै अत्यावश्यक सहयोग तथा समन्वयका लागि नेपाल प्रहरीको १००, सशस्त्र प्रहरी बलको ११४ र जिल्ला आपत्कालीन कार्य सञ्चालन केन्द्रको १२३४ नम्बरमा सम्पर्क गर्न आग्रह गरेको छ।

जिल्ला प्रशासन कार्यालयले सम्भावित बाढी, पहिरो तथा अन्य विपद्जन्य घटनाप्रति उच्च सतर्कता अपनाउन, अनावश्यक यात्रा नगर्न तथा सम्बन्धित निकायबाट जारी हुने आधिकारिक सूचनाको पालना गर्न सबैमा अनुरोध गरेको छ।