दार्चुला ६ साउन/दार्चुला जिल्लाभित्र सञ्चालन हुने सार्वजनिक यातायातका सवारी साधनको गाडीभाडा पुनरावलोकन गरिएको छ। प्रमुख जिल्ला अधिकारी वर्तराज पौडेलको अध्यक्षतामा मंगलबार बसेको बैठकले विभिन्न सरोकारवालासँगको छलफल, अध्ययन तथा सुझावका आधारमा नयाँ भाडादर लागू गर्ने निर्णय गरेको हो।

जिल्ला प्रशासन कार्यालयका अनुसार इन्धनको मूल्य, सडकको अवस्था, दूरी, सवारी साधनको प्रकार, मर्मत तथा सञ्चालन खर्च, बीमा, कर, चालक-सहचालकको पारिश्रमिक, भौगोलिक जटिलता तथा सार्वजनिक यातायातको उपलब्धताजस्ता पक्षलाई आधार मानेर भाडादर पुनरावलोकन गरिएको हो। यसअघि गठित उपसमितिले स्थलगत अनुगमन गरी तयार पारेको प्रतिवेदन तथा सिफारिसलाई आवश्यक अध्ययन, परिमार्जन र संशोधनपछि निर्णय गरिएको प्रशासनले जनाएको छ।

निर्णयअनुसार अब कालोपत्रे सडकमा प्रतिकिलोमिटर ७ रुपैयाँ ५० पैसा, ग्राभेल सडकमा प्रतिकिलोमिटर १२ रुपैयाँ र कच्ची सडकमा प्रतिकिलोमिटर १६ रुपैयाँ गाडीभाडा कायम गरिएको छ।

जिल्लाभित्रका सबै सडक खण्डमा यही भाडादर लागू हुने जिल्ला प्रशासन कार्यालयले जनाएको छ। सहायक प्रमुख जिल्ला अधिकारी मोहनसिंह धामीका अनुसार जिल्लाभित्र रहेका एक सयभन्दा बढी सडक रुटको गाडीभाडा यही नयाँ दररेटका आधारमा निर्धारण गरिनेछ।

त्यसैगरी, सडक दूरीका सम्बन्धमा सम्बन्धित स्थानीय तह, सरोकारवाला निकाय तथा सुरक्षा निकायसँग समन्वय गरी वास्तविक दूरी यकिन गरेर प्रतिकिलोमिटर दरका आधारमा जिल्ला प्रशासन कार्यालयले प्रत्येक रुटको अन्तिम भाडादर सार्वजनिक गर्ने निर्णय पनि गरिएको छ।जिल्ला प्रशासन कार्यालयले प्रकाशन गरेको मितिदेखि नै नयाँ भाडादर लागू हुने जनाएको छ।