धनगढी,२८ असार । बैतडीको दशरथचन्द नगरपालिका–५ स्थित दशरथचन्द स्वास्थ्यचौकीमा बच्चा जन्माउने आमालाई वडा कार्यालयले थप प्रोत्साहन भत्ता दिएको छ । चालु आर्थिक वर्षमा स्वास्थ्यचौकीमा आएर बच्चा जन्माएका ५ जना आमाहरुलाई २ हजार ६ सयका दरले थप प्रोत्साहन भत्ता उपलब्ध गराएको वडाध्यक्ष केशवराज लेखकले बताए । उनका अनुसार वडा कार्यालयले चालु आर्थिक वर्षको वडाको बजेटमै थप प्रोत्साहन भत्ता व्यवस्था गरेको थियो ।

नेपाल सरकारले स्वास्थ्य संस्थामा सुत्केरी हुन आउने आमालाई यातायात बाफत २ हजार र चार पटक गर्भजाँच गरेबाफत ८ सय रुपैयाँ प्रोत्साहन भत्ता दिँदै आएको छ । सुरक्षित मातृत्व कार्यक्रम अन्तर्गत संघीय सरकारले उक्त रकम प्रदान गर्दै आएको छ । वडा कार्यालयले घरमा हुने सुत्केरी शून्य बनाउन र सबैको स्वास्थ्य संस्थामा पहुँच बढाउन दशरथचन्द स्वास्थ्यचौकीमा बच्चा जन्माउने आमालाई थप प्रोत्साहन भत्ता दिँदै आएको वडा सदस्य नन्दा भट्टले बताइन् ।