धनगढी ५ जेठ/नागरिक उन्मुक्ति पार्टीले सांसद रामेश्वर चौधरी र लक्ष्मण किशोर चौधरीलाई सुदूरपश्चिम प्रदेश सरकारमा पठाउने निर्णय गरेको छ । नाउपा संसदीय दलका नेता घनश्याम चौधरीले प्रधानमन्त्रीसहित शीर्ष नेता र आफूहरुबीच २ मन्त्रालयमा सहमति भएको बताए । रामेश्वरलाई सामाजिक विकास र लक्ष्मण किशोरलाई भूमि व्यवस्था कृषि तथा सहकारी मन्त्रालयको जिम्मेवारीमा पठाउने निर्णय भएको नेता चौधरीले बताए ।

मन्त्री बनाउनका लागि नाउपाले संसदीय दलका नेता र प्रमुख सचेतकको जिम्मेवारी समेत फेरबदल गरेको छ । यसअघि दलको नेतामा रामेश्वर र प्रमुख सचेतकमा लक्ष्मण किशोर रहेका थिए । प्रमुख सचेतकको जिम्मेवारी हाल खुसीराम चौधरीले पाएका छन् । मुख्यमन्त्री कमलबहादुर शाहले आफ्नो १०० दिने उपलब्धि सार्वजनिक पनि आजै सरकारले पूर्णता पाउने बताएका छन् । जसअनुसार नेकपा माओवादी केन्द्रले मन्त्रीको नाम टुङ्गो लगाएको छ । शुक्रबार भएको छलफलमा जुटन् नसकेपछि शनिबार १० बजे मन्त्रीमण्डल बिस्तार गर्ने कार्यक्रम रहेको छ ।