काठमाडौँ ५ पुस/ प्रमुख प्रतिपक्षी दल नेपाली कांग्रेसले प्रतिनिधिसभा विघटन गर्ने सरकारको निर्णयविरुध्द रणनीति बनाउन सोमबार सर्वदलीय बैठक बोलाएको छ । आइतबार आकस्मिक रूपमा बसेको कांग्रेस पदाधिकारी बैठकले सोमबार एक बजे सानेपास्थित पार्टी केन्द्रिय कार्यालयमा सर्वदलीय बैठक बोलाउने निर्णय गरेको नेता बालकृष्ण खाणले जानकारी दिए ।

कांग्रेसले केपी शर्मा ओली नेतृत्वको सरकारको प्रतिनिधिसभा विघटन गर्ने कदमलाई अलोकतान्त्रिक र असंवैधानिक भन्दै भ्रत्सना गरेको छ । ‘सरकारको प्रतिनिधि सभा विघटन गर्ने कदम अलोकतान्त्रिक र असंवैधानिक हो । त्यसको कांग्रेसले भ्रत्सना गरेको छ,’ बैठकपछि नेता खाणले भने, ‘हामीले यो कदमको विरोध र प्रतिवाद गर्न सबै राजनीतिक दललाई आब्हान गरेका छौ । सरकारको यो कदमपछि गर्ने प्रतिवादको रणनीति बनाउन भोली दिउसो एक बजे पार्टी केन्द्रीय कार्यालय सानेपामा सर्वदलीय बैठक बोलाएका छौं ।’

कांग्रेसले संविधानको प्रतिकुलतामा सरकारले गरेका निर्णय सच्याउने दायित्व राष्ट्रपति विद्यादेवी भण्डारीको भएपनि त्यो काम भण्डारी चुकेको आरोप लगाएको छ । ‘संविधानको प्रतिकुलतामा सरकारले गर्ने निर्णय सच्याउने दायीत्व राष्ट्रको अभिभावकका नाताले राष्ट्रपतिको हो । त्यो काम गर्न राष्ट्रपति चुकेको निष्कर्ष पदाधिकारी बैठकले निकालेको छ,’ खाणले भने । त्यस्तै कांग्रेसले मंगलबार दियसो १ बजे केन्द्रिय कार्यसमिति बैठक पनि बोलाएको छ ।