सुदूरपश्चिमको सामाजिक विकास मन्त्रालय र प्रदेश स्वास्थ्य निर्देशनालयले कोरोना भाईरसको अपडेट र स्वास्थ्यसंस्थाको अवस्थाबारे हरेक साँझ तथ्याङक सार्वजनिक गर्दै आएको छ। असार १३ गतेसम्म सार्वजनिक गरिएको तथ्याङक अनुसार सुदूरपश्चिम प्रदेशमा १४ शैयाको आईसियू कक्ष र १० वटा भेन्टिलेटर उपलव्ध छ।
सेती प्रादेशिक अस्पतालमा १० र महाकाली अस्पतालमा चार शैयाको आईसियू तथा सेती अस्पतालमा ६, महाकाली र डडेल्धुरा अस्पतालमा दुईरदुई वटा भेन्टिलेटर उपलव्ध रहेको भन्दै सामाजिक विकास मन्त्रालय र स्वास्थ्य निर्देशनालयले तथ्याङक सार्वजनिक गरेका छन्।
एक महिनासम्म महाकाली अस्पतालमा चार बेडको आईसियू र दुई वटा भेन्टिलेटर रहेको भन्दै तथ्याङक सार्वजनिक गरिएकोमा १४ असारमा भने उक्त तथ्याङक परिमार्जन गरियो। १४ असारमा महाकाली अस्पतालमा रहेका दुई वटा आईसियू बेड घटायो भने दुई वटा मात्रै उपलव्ध रहेको तथ्याङक सार्वजनिक गरियो। एक महिनासम्म दुई वटा भेन्टिलेटर उपलव्ध रहेको जानकारी दिईएकोमा १४ असारमा भने एउटा समेत भेन्टिलेटर उपलव्ध नभएको भन्दै तथ्याङक सार्वजनिक गरियो।
१४ असारदेखि नयाँ तथ्याङक सार्वजनिक भएसंगै महाकालीमा चार बेडको आईसियू र दुई वटा भेन्टिलेटर रहेको भन्दै सामाजिक विकास मन्त्रालय र स्वास्थ्य निर्देशनालयले झुठको खेती मात्रै गरेको पुष्टि भएको छ। महाकाली अस्पतालका सूचना अधिकारी नारद प्रसाद भट्टले अस्पतालमा भेन्टिलेटर नै नभएको बताउँदै भने, ‘आईसियू बेड त राखिएको छ तर सञ्चालनमा आएको छैन्।’
प्रत्येक दिन झुठो विवरण दिएर प्रदेशवासीलाई भ्रममा पारेपछि बुधवार एक बालकले उपचार नपाएर ज्यान गुमाउनु परेको छ। कञ्चनपुरको भीमदत्त नगरपालिका वडा नम्वर १६ का १४ बर्षीय पर्वत गिरीलाई बुधबार बिहान सर्पले टोकेपछि महाकाली अस्पताल पुगाइएको थियो। महाकाली अस्पतालमा आईसियू र भेन्टिलेटर उपलव्ध छ भनेरै उनलाई त्यहाँ पुगाईएको हो।
‘बेहोस अवस्थामा रहेका बालकलाई महाकाली अस्पताल पु¥याइएको थियो,’ अस्पतालका सूचना अधिकारी भट्टले दिनेश खवरलाई भने, ‘ अस्पतालमा भेन्टिलेटर र आइसियु नभएपछि धनगढी रिफर गरिएको थियो।’ महाकाली अस्पतालमा आईसियू र भेन्टिलेटर उपलव्ध भएको गलत जानकारी पाएका कारण उनलाई सेती प्रादेशिक अस्पतालमा समयमा पुगाउन सकिएन र उनको बाटोमै मृत्यु भयो।
‘सामाजिक बिकास मन्त्रालय र प्रदेश स्वास्थ्य निर्देशनालयले प्रत्येक दिन अपडेट गर्ने डाटामा महाकाली अस्पतालमा २ भेन्टिलेटर छ भनिएको छ,’ पत्रकार दिलवहादुर छत्यालले फेसवुकमा स्टाटस लेखेका छन्, ‘तर महेन्द्रनगरमा सर्पले टोकेको १४ बर्षिय बालकको महाकाली अस्पतालमा एउटा पनि भेन्टिलेटर नभएर नै अकालमै ज्यान गएको छ।’ यता सामाजिक विकास मन्त्रालयका स्वास्थ्य महाशाखा प्रमुख नरेन्द्र काकीले भने भेन्टिलेटर खरिदको चरणमा रहेको बताउँदै महाकालीमा अहिले भेन्टिलेटर उपलव्ध नरहेको जानकारी दिए।
