कैलालीमा लागुऔषधको कारोवार रोक्न प्रहरी सक्रिय भएको छ। जिल्लामा हुने अधिकासं अपराधिक गतिविधिमा लागुऔषध सेवनकर्ताकै संग्लनता देखिन थालेपछि लागुऔषधको कारोवार नियन्त्रणमा प्रहरीको सक्रियता बढ्दै गएको हो। जिल्ला प्रहरी कार्यालय कैलालीका अनुसार नयाँ आर्थिक बर्षको ५ महिनाको अवधीमा मात्रै ८० जना सेवनकर्ता र कारोवरी पक्राउ परेका छन्।

‘साउनयता ८० जना कारोवारी र सेवनकर्तालाई नियन्त्रणमा लिएर मुद्धा चलाएका छौँ,’ जिल्ला प्रहरी कार्यालय कैलालीका प्रहरी नायव उपरिक्षक दक्षकुमार बस्नेतले भने, ‘उनीहरुविरुद्ध ५१ वटा मुद्धा दर्ता गर्दै अहिले कारवाहीको प्रक्रिया अगाडी बढेको छ।’

उनक अनुसार मंसिर महिनामा मात्रै अहिले सम्म २३ जना कारोवारी र सेवनकर्ता पक्राउ परिसकेका छन्। ‘हत्या, हिसां जस्ता जघन्य अपराध र चोरीका घटनामा पनि अधिकासं लागुऔषध सेवनकर्ताकै संग्लनता हुने गरेको देखिएपछि हामीले कारोवार नै रोक्न सक्रियता बढाएका छौँ।’ उनका अनुसार कुलतमा फस्ने युवाहरुको सङख्या पनि बढ्दै गएका कारण पक्राउ पर्ने क्रम पनि बढेको हो।

‘कुलतबाट जोगाउने पहिलो जिम्मेवारी घरपरिवारका सदस्यकै हो,’ प्रहरी नायव उपरिक्षक बस्नेतले भने, ‘प्रहरीले पक्राउ गर्दैमा लागुऔषधको जालो नियन्त्रण हुन सक्दैन्, कुलतबाट आफ्नो छोराछोरीलाई जोगाउनका लागि अभिभावक नै सजक बन्नुपर्छ।’

अहिले पक्राउ परेका लागु औषधका कारोवारी र सेवनकर्ता मध्ये अधिकासं यसअघि पनि पक्राउ परिसकेका हुन्। उनीहरु धरौटीमा छुट्ने र फेरी कारोवारमा संग्लन हुने समस्याले नियन्त्रणमा चुनौती बढ्दै गएको जिल्ला प्रहरी कार्यालय कैलालीले जनाएको छ। पछिल्लो समय लागुऔषको कारोवार र सेवनमा महिलाहरुको संग्लनता पनि बढ्दै गएको छ।

कैलालीमा लागुऔषधको बिगबीगी हुनुको पछाडी सीमावर्ती भारतीय बजार नै प्रमुख कारक तत्व भएको प्रहरी अधिकारीहरुले बताउँदै आएका छन्। धनगढीमा सबैभन्दा बढि गौरीफन्टा नाका भएर लागु औषध भित्रिने गरेको छ भने कतिपय युवाहरु त लागु औषध सेवन गर्नकै लागि भारतीय बजार जाने गरेका छन्।

अहिले त्रिनगर नाकामा एसएसबी र गौरीफन्टा प्रहरीकोसंग पनि लागुऔषको कारोवार रोक्न नेपाल प्रहरीले समन्वय भईरहेको जनाएको छ। सीमा क्षेत्रमा लागुऔषधको ओसारपसारमा कडाई गरिएपछि अपराधिक गतिविधी नियन्त्रणमा समेत महत्वपूर्ण भूमिका खेल्न विश्वास गरिएको छ।