खुटिया नदीबाट अवैध रुपमा बालुवा ल्याउँदै गरेको अवस्थामा सात वटा ट्याक्टर सहित सात जना पक्राउ परेका छन्। सशस्त्र प्रहरी बल नेपाल नम्वर ३४ गण हेडक्वाटर कैलालीको टोलील्े धनगढी उप–महानगरपालिका वडा नम्वर १९ पथरियाबाट सात ट्याक्टर सहित सात जना चालकलाई पक्राउ गरेको हो।

धनगढी उप–महानगरपालिका १ बसन्त टोलका संजय यादव, सोही ठाउँका सुनिल चौधरी र रामपुकार सहानी, वडा नम्वर ५ जाईका गजेन्द्र चौधरी, वडा नम्वर ८ का करन चौधरी, वडा नम्वर ६ जालीका ईन्द्र चौधरी र वडा नम्वर ७ मनहेराका बर्षातु चौधरीलाई उनीहरुले चलाएको ट्याक्टर सहित पक्राउ गरिएको सशस्त्र प्रहरी बल नेपाल नम्वर ३४ गण हेडक्वाटर कैलालीका सशस्त्र प्रहरी नायव उपरिक्षक भीम चन्दले बताए।

‘खुटिया नदीबाट अवैध रुपमा बालुवा लोड गरि ल्याउँदै गरेको अवस्थामा उनीहरुलाई पक्राउ गरिएको हो,’ सशस्त्र प्रहरी नायव उपरिक्षक चन्दले भने, ‘आवश्यक कारवाहीका लागि ट्याक्टर सहित ७ जनालाई नै जिल्ला समन्वय समिति कैलाली पठाएका छौ।’

बर्षातको समयमा नदीजन्य पदार्थको उत्खननमा रोक लगाईएपनि अटेरी गर्दै बालुवा उत्खनन गरेपछि उनीहरुलाई पक्राउ गरिएको सशस्त्र प्रहरी बल नेपाल नम्वर ३४ गण हेडक्वाटर कैलालीले जनाएको छ। जिल्ला समन्वय समितिले निगरानी राखिदिन अनुरोध गर्दै पत्र समेत पठाएकोले अहिले खोलानालामा निगरानी बढाएको समेत सशस्त्र प्रहरी हेडक्वाटर कैलालीले जनाएको छ।

दिनेश खबरबाट