धनगढी, २३ भदौ ।
चार थान पेस्तोल, दर्जनौ तमसुक, चेक र नक्कली छाप सहित पक्राउ परेका सञ्जय राणाले आफ्नो अपराध स्वीकार गरेका छन् । यद्दपि उनले अहिलेसम्म उनी संलग्न भएका अपराधहरु, आफ्नो समूह र अपराधीहरुसंगको कनेक्सनका बारेमा बताउन भने मानेका छैनन । प्रहरीलाई बयान दिने क्रममा उनले आफूलाई कारबाही गर्न आग्रह गर्दै आफूबाट अपराध भएको स्वीकार गरेको प्रहरी स्रोतले बतायो ।यद्दपि उनले आफ्नो बारेमा कुनै पनि सूचना र जानकारी दिन भने मानेका छन्, एक प्रहरी अधिकृतले भने, कानून विपरित क्रियाकलाप गरेको स्वीकार गरेपनि त्यससंग सम्बन्धित कुनै पनि जानकारी दिन मानेका छैनन । प्रहरीले राणालाई अत्यन्त चाम्रो भएको बताए ।

तीनदिनसम्म उनीसंग जानकारी लिनका लागि प्रहरीले धेरै उपाय अपनाईसकेको छ, तर उनी यति चाम्रो छन् कि कुनै पनि जानकारी दिन मानिरहेका छन् ।
उनले सही कुरा नखोलेका कारण प्रहरी उनको पोलीग्राफ टेष्ट गर्ने तयारीमा जुटेको छ ।
उनी कुनै बेला खुलेर कुरा गर्छन । र निस्फिक्री देखिन्छन् । उनलाई कुनै तनाव नभएको जस्तो देखिन्छ । तर कुनै बेला अत्यन्त निराश र हताश देखिन्छन, प्रहरी स्रोतले भन्यो, उनी अरुलाई ठग्ने मामिलामा नटवरवाल नै देखिन्छन ।
प्रहरीसंग बयानको क्रममा उनले आफूले गलत काम गरिरहेको थाह भएपनि यति चाडो पक्राउ गर्ने कुरामा भने विश्वास गरेको बताएका छन् ।
जिल्ला प्रहरी कार्यालय कैलालीका प्रमुख प्रहरी उपरीक्षक सुदीप गिरीले उनीबाट सत्य कुरा ओकेल्न पोलीग्राफको प्रयोग गर्ने तयारीमा जुटेको बताए ।
उनले राष्ट्र बैंकको एउटै चेकले धेरैलाई प्रलोभनमा पारेर ठगेको प्रहरी उपरीक्षक गिरीले बताए ।
पोलीग्राफको प्रयोगले कुनै व्यक्तिले झुट वा सही के बोलिरहेको छ पत्ता लाग्ने विश्वास गरिन्छ । नाडी र मुटुको धडकनबाट सही र झुट बोलेको पत्ता लगाउन पोलिग्राफको प्रयोग गरिन्छ ।
नेपाल राष्ट्र बैंकको एक सय छ करोड रुपैयाको चेक देखाएर उनले धेरै व्यक्तिलाई झुक्याएर ठगेको स्वीकार गरेका छन् ।
आफूलाई राष्ट्र बैंकको चेक देखाएर राणाले ठगेको भन्दै केही व्यक्तिले प्रहरीलाई मौखिक उजुरी पनि दिएका छन् ।
आफूसंग भएको राष्ट्र बैंकको एक सय छ करोडको चेक केही दिनमा साटिने र त्यसका लागि प्रकृया पुरा हुन एक हप्ता लाग्ने भन्दै उनले झुक्याईएको पाईएको छ । उनले त्यही चेक देखाएर एक जना व्यक्तिलाई काठमाण्डौंमा रहेको राष्ट्र बैंकको केन्द्रीय कार्यालय र केही व्यक्तिलाई राष्ट्र बैंकको धनगढी स्थित कार्यालय समेत लगेका थिए । आफूसंगै लगेका ती व्यक्तिलाई राष्ट्र बैंक बाहिर राखेर भित्र पसेका राणा आधा घण्टापछि फर्केर चेकको कानुनी प्रकृया सबै पुरा भईसकेको र एक साताभित्र रकम पाउने बताएर ती व्यक्तिलाई प्रलोभनमा पार्न सफल भएको प्रहरी अनुसन्धानबाट खुलेको छ ।
कतिसम्म भने थुप्रै व्यक्तिलाई झुक्याउनका लागि राणाले आफ्नो मोवाईलबाट आफ्ना वकिललाई फोन गरेर सोधेको नाटक गर्ने गरेको पाईएको छ । उनले यताबाट चेकको कानुनी प्रकृया पुरा हुन कति दिन लाग्छ भनेर सोधे । उताबाट जवाफ आउने गरेको थियो, सबै प्रकृया पुरा भईसकेकोले एक साताभित्र चेकको रकम प्राप्त हुन्छ ।

यो संवाद आफूसंग भएका व्यक्तिलाई सुनाउने गरेका थिए ।
यसरी उनले धेरै व्यक्तिलाई त्यो संवाद सुनाएर प्रलोभनमा पारेको देखिन्छ, प्रहरी उपरीक्षक गिरीले भने, उनले व्यक्ति अनुसार गफ दिने गरेको पाईएको छ ।
कतिपय व्यक्तिलाई राणाले भारतको राजस्थानमा आफ्नो छ सय बिगाहा जग्गा भएको बताएको पाईएको छ ।
उनले सय करोड र सय बिगाहा जमिनभन्दा कमका गफ गर्ने गरेका थिएनन, यो कुरा बयानका क्रममा स्वयम राणाले स्वीकार गरेको प्रहरीले जनाएको छ ।
प्रहरी नै उनले दिने गफ र गफ गर्ने तरिका देखेर चकित परेको छ । प्रहरीका अनुसार उनी जो सुकैलाई आफ्नो गफको प्रभावमा पार्ने माहिर देखिन्छन ।
उनी जुन सुकै व्यक्तिलाई आफ्नो कुराको प्रभावमा पार्न सक्ने देखिएको छ । प्रहरीले उनका धेरै पाटाहरु पत्ता लागीनसकेकोले उनका गतिबिधि र उनी रहस्यमयी भएको बताएको छ ।
स्रोतका अनुसार उनी आफूसंग संगत गरेकाहरुका लागि पनि रहस्यमयी थिए । धनगढीका सबै क्षेत्रका व्यक्तिसंग उनको हिडडुल थियो । प्रहरी, राजनैतिक दल, पत्रकार, विद्यार्थी संगठनका नेता, जग्गा दलाल, व्यापारीसंग उनको निकट सम्बन्ध र उठबस थियो ।
उनले सबै राजनैतिक दलको नेतासंग राम्रो सम्बन्ध रहेको प्रहरीसंगको बयानका क्रममा खोलेका छन् । यद्दपि कुन नेताले आफूलाई संरक्षण दिएको छन्, भन्ने कुरा भने खोलेका छैनन ।
उनले आफूले सबै राजनैतिक दललाई आर्थिक सहयोग गरेको समेत दावी गरेका छन् ।
आफू मदिरा नखाने भएपनि उनले प्रहरी, राजनैतिक दल, पत्रकार, विद्यार्थी संगठनका नेता, जग्गा दलाल, व्यापारीलाई मदिरा खुवाउने गरेको पाईएको छ ।
राजसी ठाट, आलिशान बंगला र महंगो सपिङ गर्ने उनको सौखका कारण जो सुकै व्यक्ति उनको प्रभावमा पर्ने गरेका थिए ।
मान्छे अनुसार गफ दिने उनको बानी थियो । बयान लिने क्रममा उनको कुरा सुनेर चकित भएको प्रहरीले उनलाई नटवरलालको संज्ञा दिएको छ ।
उनले अधिकांशलाई भने आफू जग्गाको ठूलो कारोवारी भएको बताउने गरेको पाईएको छ । स्रोतका अनुसार उनीसंगै हिड्नेलाई पनि उनले के काम गर्छन भन्ने थाह हुन्थेन ।

स्रोत भन्छ, पछिल्लो पटक उनीसंग खानपिन गर्न पाईने प्रलोभनमा युवाहरु उनीसंग संगत गर्न रुचाउथे ।
पछिल्लो समय पत्रकारहरुसंग समेत राम्रो सम्बन्ध बनाएका राणा अनलाईन चलाउने तयारीमा थिए । उनले अनलाईनका लागि लगानी समेत गरिसकेको बुझिएको छ ।
उनको कनक्सेन र सम्बन्ध भएका व्यक्तिहरुको फेहरिस्तले उनी जुन सुकै पेशा, बर्ग र क्षेत्रका व्यक्तिहरुसंग राम्रो सम्बन्ध बनाउन माहिर देखिन्छन ।
उनीसंग संगत गरेका कतिपय व्यक्तिहरु भने उनी हातहतियार सहित पक्राउ परेपछि आफ्नो सम्बन्ध उनीसंग भएको स्वीकार गर्न डराउछन् ।
तर कतिपय व्यक्ति भने राणालाई यस्तो अपराधमा संलग्न भएको होला भन्ने सोच्न नसकेको बताउछन ।
प्रहरीले यसअघि पनि उनीसंग सोधपुछ गरेको समेत खुलेको छ । यद्दपि प्रमाणका आधारमा उनीमाथि कुनै मुद्दा चलाउन भने सकेन ।
पछिल्लो पटक प्रहरीको केन्द्रीय अनुसन्धान व्युरोको टोली लामो समयको अनुसन्धानपछि उनलाई सप्रमाण समात्न सफल भएको हो ।
प्रहरीले उनीसंग बरामद गरेका ट्राफिक प्रहरीका सिट,बेल्ट, नेमप्लेट र ड्रेसका आधारमा नविल बैंकको पैसा लुट्न पनि राणाको संलग्नता रहेको आशंका गरेको छ । त्यसमा पनि अनुसन्धान थालेको छ ।
२०७० साल पुस महिनामा महेन्द्रनगरबाट नविल बैंकको २ करोड ३० लाखख ६० हजार रुपैया नेपाल राष्ट्र बैंकमा जम्मा गर्न ल्याउने क्रममा कैलालीको मालाखेतीमा लुटिएको थियो । लुटपाटमा संलग्न व्यक्तिले ट्राफिक प्रहरीको पोशाक लगाएका थिए । ६ वर्षबित्दा पनि प्रहरीले उक्त घट्नामा संलग्न व्यक्ति पक्राउ गर्न सकेको छैन ।
राणासंग फेला परेका ट्राफिक प्रहरीका पोशाक र सामग्रीका आधारमा प्रहरीले उनलाई नविल बैंकको रकम लुटपाट प्रकरणमा समेत जोडेर अनुसन्धान गरिररहेको छ ।

उनीमाथि हातहतियार तथा खरखजाना, हतियारको अबैध व्यापार गरेको, किर्ते कागजात,जालसाजी गरेको, ठगी गरेको, दुई वटा नागरिकता बनाएको लगायतका आधा दर्जन भन्दा बढि मुद्दा चलाउने तयारीमा प्रहरी जुटेको छ ।
त्यसबाहेक सम्पत्ती शुद्धिकरणको मुद्दा पनि उनीमाथि चल्ने भएको छ ।
प्रहरीले उनी संलग्न सबै अपराधका विषयमा खोजी गरिरहेको छ । सबै कुरा पत्ता लागेपछि उनीमाथि कति मुद्दा चलाउने तय गर्ने प्रहरीले जनाएको छ ।
उनीसंग सम्बन्ध भएका बिभिन्न पेशाका व्यक्ति र नेताले उनलाई जोगाउने प्रयास शुरु गरेका छन् । मटियारीमा रहेको घर उनको नाममा नभएको समेत बताउन थालेका छन् ।
यद्दपि उनी कसैको प्रभाव र दवावमा उन्मुक्ति पाउने अवस्था नरहेको प्रहरी बताउछ । उनीमाथि दर्जनौ मुद्दा दायरा हुने संभावना छ ।