सुकेघारास्थित एक शैलुनमा र घट्टेकुलोस्थित एक घरको कोठामा बिस्फोट भएको थियो । दुबै घटनामा प्रतिबन्धित पार्टी नेकपा विप्लव समूहको संलग्नता भेटिएको छ ।

सुकेधारा विस्फोटमा घाइते भई ओम अस्पतालमा उपचाररतमध्ये नेवाः मुक्ति मोर्चाका अध्यक्ष सुरेन्द्र महर्जनले प्रहरीलाई त्यही वयान दिएका छन् ।

‘महर्जनले बम बनाउने क्रममा विस्फोट भएको बयान दिएका छन्,’ महानगरीय प्रहरी अपराध महाशाखाका प्रमुख एसएसपी सहकुल थापाले अनलाइनखबरसँग भने ।

सुकेधारा बिस्फोटमा एकजनाको घटनास्थलमै र दुईजनाको ओम अस्पतालमा उपचारका क्रममा मृत्यु भएको छ । मृतकको सनाखत हुन सकेको छैन ।

पक्राउ परेका सुरेन्द्रले प्रहरीलाई बताए अनुसार सुकेधारामा उनीसहित ६ जनाको समूह थियो । उनीसँगै हरि खड्का, शिव र लडाकू महावीर थिए । दुईजना भने नयाँ रहेको सुरेन्द्रले प्रहरीलाई वयान दिएका छन् ।

शैलुन सञ्चालक जीवकुमार ठाकुर पनि घाइते भएका छन् । मृतक को–को हुन् भन्ने खुलेको छैन ।

विद्यार्थीको डेरामा बिस्फोट

सुकेधारामा बिस्फोट भएकै समयमा घट्टेकुलोमा पनि विस्फोट भएको छ ।

विस्फोटमा प्रज्वल शाहीको मृत्यु भएको छ भने रविन केसी घाइते भएका छन् । केसी विप्लव समूहसम्वद्ध विद्यार्थी संगठनको त्रिचन्द्र कलेजका इकाई अध्यक्ष भएको खुलेको छ ।

विप्लव समूहले सोमबार नेपाल बन्द आह्वान गरेको छ । त्यही क्रममा विभिन्न स्थानमा बम राख्न बनाइएको र त्यही क्रममा विस्फोट भएको पाइएको छ ।

टाइम र रिमोर्टसमेत नभेटिएकाले बम बनाउने क्रममै विस्फोट भएको प्रहरीको विश्लेषण छ ।