काठमाण्डौं, २३ भदौ/प्रतिनिधि सभा सदस्य तथा कृषि, सहकारी तथा प्राकृतिक श्रोत समितिकी सभापति डा. आरजु राणा देउवा र नेपालका लागि दक्षिण कोरियाका राजदूत तेइ योङ पार्कबीच शुक्रवार भेटवार्ता भएको छ ।

दक्षिण कोरियाली राजदूत पार्कसंगको भेटमा कृषि, सहकारी तथा प्राकृतिक श्रोत समितिकी सभापति डा. राणाले दौत्य सम्बन्ध स्थापना भएयता कोरिया सरकारबाट नेपाललाई प्राप्त सहयोगका लागि धन्यवाद दिईन । राणाले कोरिया सरकारबाट खुटिया–दीपायल फाष्ट ट्रयाक निर्माण, धनगढीमा रहेको होल्डिङ सेल्टरमा महिला तथा बालबालिकाको अस्पताल सञ्चालन र सुदूरपश्चिममा प्राबिधिक तालिम केन्द्र स्थापनाका लागि सहयोग गर्न आग्रह गरिन ।

राणाले खुटिया–दीपायल फाष्ट ट्रयाक निर्माणले सुदूरपश्चिमका पहाडी जिल्लासंगको तराईको दूरी अत्यन्त छोटो हुने र त्यसले पहाडी जिल्लामा जलविद्युत आयोजना निर्माण समेत अत्यन्त सहज हुने बताईन । डा. राणाले सुदूर पश्चिममा महिला तथा बालबालिकाको मृत्यु दर अत्यािधक रहेकोले महिला तथा बालबालिकाको सुबिधा सम्पन्न अस्पताल सञ्चालन गर्न आवश्यक रहेको बताईन ।उनले महिला तथा बालबालिका अस्पताल सञ्चालनका लागि धनगढीमा रहेको होल्डिङ सेल्टर उपर्युक्त रहेको जानकारी दिईन । डा। राणाले सुदूरपश्चिममा जलविद्युत क्षेत्रमा लगानीका लागि समेत राजदूत पार्कसंग आग्रह गरिन ।
नेपाल र दक्षिण कोरियाबीच दौत्य सम्बन्ध स्थापना भएको ५० वर्ष पुगेकोमा डा। राणाले कोरियाली राजदूतलाई पार्कलाई बधाई दिईन ।उनले राजदूत पार्कलाई सुदूर पश्चिम प्रदेश भ्रमणका लागि समेत आग्रह गरिन ।

कोरियाली राजदूत पार्कले कोरियाले दौत्य सम्बन्ध स्थापना भएयता नेपालका बिभिन्न क्षेत्रमा गरिरहेको लगानी तथा सहयोगलाई आगामि दिनमा बृद्धि गर्ने बताए । राजदूत पार्कले नेपालसंग कोरियाको दौत्य सम्बन्ध अत्यन्त समधुर रहेको बताउदै नेपालको विकासका लागि जलविद्युत, सेवा क्षेत्र, प्राबिधिक शिक्षा र उद्योगधन्दा र पूर्बाधारमा गर्दै आएको लगानीलाई निरन्तरता दिने बताए ।उनले डा। राणाको आग्रहमा डिसेम्बर पहिलो साता सुदूरपश्चिमको भ्रमण गर्ने प्रतिबद्धता गरेका छन् ।

डा. राणाको आग्रह स्वीकार गर्दै राजदूत पार्कले सुदूर पश्चिमको विकासमा साझेदारी गर्न कोरिया सरकार तयार भएको बताए । उनले यसअघि कोरियाली सरकारको सहयोगमा दार्चुलामा चमेलिया जलविद्युत आयोजना निर्माण भएको बताए । उनले उनले नेपालमा लगानी गर्ने कोरिया चौथौ ठूलो देश भएको जानकारी दिदै नेपालको पूर्बाधार, सेवा क्षेत्र, प्राबिधिक र जलविद्युतमा सहुलियत दरमा ऋण समेत उपलब्ध गराउदै आएको बताए ।