कञ्चनपुर, १० मंसिर–

जंगली हात्तीको आक्रमणबाट मृत्यु भएका कञ्चनपुरको शुक्लाफाँटा नगरपालिका १ गणेशपुरका ६५ वर्षीय बलदेव बोहराका परिवारलाई राहतस्वरुप १० लाख रकमको चेक हस्तान्तरण गरिएको छ । सोमबार सुदूरपश्चिम प्रदेश सभा सदस्य लालबहादुर खडका, डिभिजन वन कार्यालय कञ्चनपुरका प्रमुख अजय मानन्धर लगायतले संयुक्त रुपमा मृतकका श्रीमती मैनादेवी बोहराको घरमै पुगेर राहत रकमको चेक हस्तान्तरण गरेका हुन् ।

वन्यजन्तुबाट हुने क्षतिको राहत निर्देशिका २०६९ बमोजिम राहत रकम हस्तान्तरण गरिएको डिभिजन वन कार्यालयका प्रमुख अजय मानन्धरले बताए । निर्देशिका अनुसार संरक्षित क्षेत्र र राष्ट्रिय वन क्षेत्र बाहेक संरक्षित वन्यजन्तुले आक्रमणमा परी मानिसको मृत्यु भएमा राहत सहयोग स्वरुप रु १० लाख उपलव्ध गराउने प्रावधान रहेको छ । बोहराको असोज २९ गते घरनजिकै हात्तीको आक्रमणमा परी मृत्यु भएको थियो ।

यस अघि शुक्लाफाँटा नगरपालिकाले २५ हजार र राष्ट्रिय प्रकृति संरक्षण कोषले मृतकका परिवारलाई ५० हजार किरिया खर्च वाफतको रकम छुट्टा छुट्टै रुपमा उपलव्ध गराएको थियो। यसैगरी सामुदायिक वन समन्वय समितिले समेत राहतस्वरुप २५ हजार रकम हस्तान्तरण गरेको थियो ।