धनगढी, ११ असोज/नेपाली कांग्रेस डोटीको पालिका कार्यसमितिले गठबन्धनका उम्मेदबारलाई भोट नहाल्ने निर्णय गरेको छन् । मंगलबार डोटीको सदरमुकाम दिपायलसिलगढीमा डोटीका नौ पालिकाका सभापतिहरु बैठक बसी गठबन्धनका उम्मेदबारलाई भोट नहाल्ने निर्णय गरेका हुन् । डोटीमा नौ स्थानीय तह रहेका छन् ।

उक्त बैठकबाट गठबन्धनका उम्मेदवारको प्रचार–प्रसार नगर्ने र भोट नहाल्ने समेत निर्णय गरेका छन् । डोटीको दिपायलसिलगढी नगरपालिकाका नगर समितिका सभापति गणेश मलासीको अध्यक्षतामा बसेको बैठकमा जिल्लाका नौ वटै पालिकाका सभापति तथा पदाधिकारीहरुको सभागिता रहेको थियो ।

‘कांग्रेस केन्द्रको डोटीमा गठबन्धन गर्न गरेको निर्णय मान्दैनौ,’ बैठकले निर्णय गरेको छ–‘पार्टीको मर्म विपरित गरिएको निर्णयका विरुद्ध गएर प्रचार प्रसार र मतदान नगरिने उल्लेख छ ।’ जिल्लामा नेपाली कांग्रेसको परिवेश र स्थानीय तहको निर्वाचनमा प्राप्त गरेको मत परिणाम अनुसार गठबन्धन आवश्यक नरहेको बैठकको निष्कर्ष रहेको छ ।

विगतमा कांग्रेसका विरुद्ध षडयन्त्र गर्ने व्यक्ति कुनै पनि हालतमा स्वीकार्न नसकिने सभापति मलासीले बताए । गठबन्धनका नाममा कांग्रेसलाई क्षति हुनबाट बचाउन र डोटेली मतदाताको आवश्यकता, चाहनाको कदर गर्दै अगाडी बढ्ने अठोटका साथ सम्पूर्ण पालिका सभापति तथा पदाधिकारीको सल्लाह अनुसार गठबन्धन नगर्न केन्द्रीय समितिलाई दवाव दिने निर्णय भएको उनले बताए । यस अघि जिल्ला कार्यसमितिले समेत गठबन्धन स्वीकार नगर्ने निर्णय गरेको छ । कांग्रेसको भातृ संगठन तरुण दलले पनि प्रेस विज्ञप्ति जारी गर्दै गठबन्धन स्वीकार गर्न नसकिने जनाएको थियो । जिल्लाका सबै भातृ र शुभेच्छुक संगठनहरुले समेत गठबन्धन स्वीकार्य नहुने जनाउँदै आएका छन् ।