धनगढी, २० जेठ  / स्थानीय कला, संस्कृति र प्रतिभालाई प्रवर्द्धन गर्ने उद्देश्यले आयोजना गरिएको सन्ध्याकालिन धनगढी उत्सव-२०८३ को तयारी अन्तिम चरणमा पुगेको छ। धनगढी उपमहानगरपालिकाको कार्यालय र राष्ट्र बैंक चोकबीचको क्षेत्रमा सञ्चालन हुने उत्सवको भोलि (जेठ २१ गते) औपचारिक उद्घाटन गरिने भएको छ।

२० दिनसम्म सञ्चालन हुने सन्ध्याकालीन उत्सव असार ११ गतेसम्म जारी रहनेछ। गर्मीयामलाई ध्यानमा राख्दै उत्सव दैनिक साँझ ५ बजेदेखि ९ बजेसम्म सञ्चालन गरिने आयोजकले जनाएको छ।

उत्सवबारे जानकारी दिदै संयोजक गुणाकर पनेरुले सम्पूर्ण तयारी अन्तिम चरणमा पुगेको र उद्घाटनको पूर्वसन्ध्यामा आवश्यक व्यवस्थापन कार्य तीव्र रूपमा भइरहेको बताए।

आयोजक प्रभात मिडिया एण्ड इभेन्ट प्रालिका अध्यक्ष प्रकाश छेडालका अनुसार उत्सवलाई सानो तर प्रभावकारी स्वरूपमा सञ्चालन गरिँदैछ। विशेषगरी स्थानीय कलाकारलाई आफ्नो प्रतिभा प्रदर्शन गर्ने अवसर प्रदान गर्दै उनीहरूलाई राष्ट्रिय स्तरसम्म पुर्‍याउने लक्ष्यका साथ कार्यक्रम आयोजना गरिएको उनले बताए।

उत्सवमा करिब ३० वटा स्टल रहनेछन् भने दर्शकको मनोरञ्जनका लागि रमाइलो मेलाको समेत व्यवस्था गरिएको छ। उत्सव सञ्चालनका लागि करिब १५ लाख रुपैयाँ खर्च हुने अनुमान गरिएको छ।

विद्यार्थीका लागि २० रुपैयाँ र सर्वसाधारणका लागि ३० रुपैयाँ प्रवेश शुल्क निर्धारण गरिएको आयोजकले जनाएको छ।

उत्सव व्यवस्थापनको जिम्मेवारी लिएको रुक्मणी टेन्ट हाउसका सञ्चालक सुरेश शाहले अधिकांश भौतिक तथा व्यवस्थापकीय तयारी पूरा भइसकेको र उत्सवलाई व्यवस्थित तथा आकर्षक बनाउन अन्तिम काम भइरहेको जानकारी दिए।

आयोजकका अनुसार धनगढी उत्सव–२०८३ ले स्थानीय भाषा, कला, संस्कृति र सिर्जनशील प्रतिभाको संरक्षण तथा प्रवर्द्धनमा टेवा पुर्‍याउनुका साथै धनगढीका दर्शकलाई २० दिनसम्म मनोरञ्जन र सांस्कृतिक अनुभूति प्रदान गर्ने अपेक्षा गरिएको छ।

भिडियो :-

https://www.facebook.com/reel/1520671366072258