बैतडी, १२ माघ /  बैतडी जिल्लाको सिगास गाउँपालिका–९ गन्सुर (कोल्धार) मा जन्मिएका वरिष्ठ लोकगायक तथा संगीतकार टेकराज अवस्थी राष्ट्रिय स्तरमा सम्मानित भएका छन्।

लामो समयदेखि नेपाली लोक, डेउडा, भजन तथा आधुनिक गीत-संगीत क्षेत्रमा निस्वार्थ र निरन्तर योगदान पुर्‍याउँदै आएका अवस्थीलाई सांस्कृतिक समाज नेपालले हालै आयोजित डेउडा उत्सव समारोह मा अभिनन्दन ताम्रपत्र प्रदान गरी सम्मान गरेको हो। समारोह पूर्वप्रधानमन्त्री तथा वरिष्ठ साहित्यकार लोकेंद्रबहादुर चन्दको प्रमुख आतिथ्यतामा सम्पन्न भएको थियो।

वि.सं. २०३० जेठ २६ गते भानुदेव अवस्थी र दानमतीदेवी अवस्थीको कोखबाट जन्मिएका अवस्थीले विद्यार्थी जीवनदेखि नै गीतसंगीतमा गहिरो रुचि राख्दै विद्यालयस्तरबाटै मादल, हार्मोनियम तथा डेउडा गायन सुरु गरेका थिए। शास्त्रीय संगीत अध्ययनका लागि ललितकला क्याम्पस, काठमाडौंमा अध्ययन गरेका अवस्थीले रेडियो नेपालमार्फत आफ्नो सांगीतिक यात्रालाई संस्थागत रूपमा अघि बढाएका हुन्।

‘ऐसेलु किरमणी झूल’ लगायतका चर्चित डेउडागीतमार्फत चिनिएका अवस्थीले हालसम्म ७ हजारभन्दा बढी गीतहरूमा संगीत संयोजन, वाद्यवादन, रेकर्डिङ तथा मिक्सिङ गरिसकेका छन्। विगत १७ वर्षदेखि अत्तरियामा आफ्नै स्वामित्वको ॐ डिजिटल रेकर्डिङ स्टुडियो सञ्चालन गर्दै आएका उनी लोकसंगीतका अथक साधकका रूपमा परिचित छन्।

चार दशकभन्दा बढी समय नेपाली गीतसंगीतको संरक्षण, प्रवर्द्धन र विकासमा समर्पित अवस्थीलाई प्रदान गरिएको यस सम्मानले सुदूरपश्चिमको लोकसंस्कृतिलाई राष्ट्रिय पहिचान दिलाउन गरेको योगदानको उच्च मूल्यांकन भएको सांस्कृतिक समाज नेपालले जनाएको छ।