धनगढी , १ असार / सुदूरपश्चिम विश्वविद्यालयले परीक्षा तालिका सार्बजनिक गरी परीक्षाको नजिक पुग्दा परीक्षा तालिका परिवर्तन गर्ने प्रवृत्तिमा निरन्तरता दिएको छ। गत वैशाखमा सञ्चालन भएका स्नातक तह प्रथम सेमेस्टरका परीक्षा जस्तै यस पटक असार १ देखि सुरु भएका परीक्षामा पनि प्राविधिक समस्या देखाउँदै विश्वविद्यालयको परीक्षा नियन्त्रण कार्यालयले सुचना निकालेर असार ७ र २१ गते हुने परीक्षाको समयतालिका परिवर्तन गरेको जनाएको छ।

यसै बिषयमा विद्यार्थी लगायत स्ववियु नेताहरुले असन्तुष्टि व्यक्त गर्दै परीक्षा नियन्त्रण कार्यालय , प्रध्यापक, कर्मचारीहरुलाई लापरबाही र अकर्मण्यताको संज्ञा दिएका छन्। अहिले सुदुरपश्चिम विश्वविद्यालय अन्तर्गतका सबै क्याम्पसका विद्यार्थी र विद्यार्थी नेतृत्वहरुले आफ्नो सामाजिक सञ्जाल मार्फत आलोचना पोखिरहेका छन् ।

पटक-पटक विद्यार्थीको मानसिक अवस्थालाई खलल पुर्याउने गरी परीक्षाको समयसारिणी परिवर्तन गरेर आफ्नो कमजोरी विद्यार्थीमाथि लाद्ने प्रवृत्ति असह्य भएको विद्यार्थी नेताहरूको भनाइ छ।

तर विश्वविद्यालयका परीक्षा नियन्त्रक अनुराधा रोकायाले भने, सुचनामा प्राविधिक समस्या भएको देखाए पनि परीक्षा सार्नुमा आफुहरुको मात्रै कमजोरी नरहेको बताइन्। क्याम्पसहरुले नै विभिन्न समस्या देखाई परीक्षाको तालिका सार्न अनुरोध गरे पछि परीक्षा तालिका परिवर्तन गरिएको उनको भनाइ छ।

यस पटक असार ७ र २१ गते लोकसेवाका परीक्षा परेकाले विद्यार्थीहरुकै समस्या र क्याम्पसहरुको अनुरोधमा परीक्षा सारिएको बताइन्।

परीक्षा नियन्त्रक रोकायाले परीक्षा सार्न सबैभन्दा बढी दवाव र अनुरोध कैलाली बहुमुखी क्याम्पसबाट आउने गरेको बताइन्।