धनगढी, १ असार /   साँघुरो त छँदै थियो, त्यसैमा प्रायः सबैतिर खाल्टाखुल्टी परेको । न गतिलो नाली न त फुटपाथ । केही वर्षअगाडि सुदूरपश्चिम प्रदेशको अस्थायी राजधानी धनगढीको मुख्य सडकको अवस्था देख्दा लाग्दैनथ्यो कि यहाँ दुई तहको सरकार छ । ग्रामीण क्षेत्रका कतिपय सडकभन्दा पनि खत्तम देखिन्थ्यो अस्थायी राजधानीको सडक ।

सडकको दुरवस्थाकै कारण अघिल्लो प्रदेश सरकारले व्यापक आलोचना खेप्नु पर्‍यो । त्यस्तो आलोचना र आक्रोशबाट स्थानीय सरकार तथा प्रदेशकै एक मात्र उपमहानगरपालिका धनगढी पनि अछुतो रहेन । दुई सरकार बसेकै सहरको सडक अव्यवस्थित, खत्तम भन्दै धेरैले आलोचना गरे । आक्रोश व्यक्त गरे । मुख्य सडक फराकिलो र राम्रो बन्नु पर्छ भन्ने आवाज धेरै उठे पनि प्राविधिक रूपमा कठिनाइ थियो ।

सडक फराकिलो बनाउनका लागि सडक किनारका कैयौँको भौतिक संरचना हटाउन जरुरी थियो । त्यस कार्यलाई धनगढीका नगरप्रमुख गोपाल हमालले पूरा गरे। धनगढीको कैलाली पुलदेखि क्याम्पस चोकसम्म सडक अधिकारक्षेत्रमा पर्ने ४२८ संरचना भत्काएर हटाइयो । त्यसपछि सो सडक निर्माणका लागि प्रदेश सरकारले बजेटको व्यवस्था गर्‍यो ।

छोटो अवधिमा अब धनगढीका कतिपय सडक आहा १ भन्नलायक बनेका छन् । कैलाली पुलदेखि पश्चिमतर्फ ट्राफिक चौराहासम्म क्षेत्रीय सहरी विकास आयोजना अन्तर्गत मुख्य सडक बनेको थियो तर पूर्वतर्फ बाँकी रहेको सडक विस्तारको कामलाई प्रदेश सरकारले पूरा गर्ने कार्य गरेको छ ।

सुदूरपश्चिम प्रदेश सरकारको ५१ करोड ६८ लाख रुपियाँ लगानीमा २।३ किलोमिटर कालोपत्रे सडक निर्माण गरिएको छ । ३० मिटर चौडा यो सडकको बिचमा मेडियन राखिएको छ । कैयौँ वर्षदेखि खाल्टाखुल्टी, कामचलाउ साँघुरा सडकलाई फराकिलो र व्यवस्थित बनाउने कार्य प्रदेश सरकारले गरेको छ ।

व्यवस्थित नाली र फुटफाथसहित यो सडक बनेको हो । सडक निर्माणका क्रममा व्यापार व्यवसाय ठप्प भएर निराश व्यवसायी फराकिलो कालोपत्रे बाटो बनेपछि खुसी देखिन्छन् । “अहिले बनेको सडक एकदम राम्रो र फराकिलो देखिन्छ,” धनगढीको क्याम्पस रोडस्थित जीवन एग्रोभेटका सञ्चालक जीवन चौधरीले भने, “प्रदेश सरकारले यो राम्रो काम गरेको छ ।” सडक बन्ने क्रममा दुई वर्ष व्यापार व्यवसाय गर्न समस्या भएको उनको भनाइ छ । प्रदेश सरकारले बनाएको फराकिलो सडकले धनगढीको सुन्दरता बढाएको चौधरीको बुझाइ छ ।