धनगढी २२ चैत/सुदूरपश्चिम विश्वविद्यालय अन्तर्गत सबै भन्दा बढी बिद्यार्थी संख्या भएको कैलाली बहुमुखी क्याम्पसमा ६ जना अध्यक्षका उम्मेबार खडा भएका छन् । चैत्र २७ गते हुने स्वतन्त्र विद्यार्थी युनियनको निर्वाचनका लागि प्रत्यक्षतर्फका उम्मेदवारहरूको चैत २१ गते प्रकाशित भएको अन्तिम नामावली अनुसार ६ जना अध्यक्षका उमेदबार भिड्ने भएका छन् । निर्वाचन कार्यतालिका अनुसार बिहीबार स्ववियु निर्वाचन कार्यसमितिले उम्मेदवारहरूको अन्तिम सूची सार्वजनिक गरेको हो।

क्याम्पसमा ११ ओटा संगठन तथा समूहबाट विभिन्न पदमा उम्मेदवारी दर्ता भएको छ। अध्यक्ष पदका लागि नेपाल विद्यार्थी संघबाट सन्तोष पन्त, अनेरास्ववियुबाट यमराज जोशी, नेकपा समाजवादी निकट अनेरास्ववियू र अखिल (समाजवादी) को संयुक्त प्यानलबाट सुनिलराज जोशी, अखिल क्रान्तिकारीबाट पवन सुनार, स्वतन्त्र विद्यार्थी एकता समूहबाट अम्बिका चौधरी र स्वतन्त्र उम्मेदवार तेज बहादुर मल्लले उम्मेदवारी दिएका छन्।

सचिव पदका लागि नेपाल विद्यार्थी संघबाट ओम प्रकाश बस्ती, अनेरास्ववियुबाट किरण प्रकाश उपाध्याय, संयुक्त प्यानलबाट खगेन्द्र प्रसाद अवस्थी, अखिल क्रान्तिकारीबाट लोकेन्द्र चौधरी, स्वतन्त्र विद्यार्थी एकता समूहबाट रोहित रावत, प्राज्ञिक विद्यार्थी परिषद् नेपालबाट लवदेव धामी, र स्वतन्त्र उम्मेदवार किशोर प्रसाद जोशी र दीपक बोहराले उम्मेदवारी दिएका छन्।

कोषाध्यक्ष पदमा नेविसंघबाट प्रमिला शाह, अनेरास्ववियुबाट प्रकाश भट्ट, संयुक्त प्यानलबाट अंगिता चौधरी, अखिल क्रान्तिकारीबाट धर्मराज तिमिल्सिना, र स्वतन्त्र विद्यार्थी एकता समूहबाट खेमराज भट्टराईले उम्मेदवारी दिएका छन्।

प्रत्यक्षतर्फ सदस्य पदका लागि पनि विभिन्न संगठनबाट उम्मेदवारी दर्ता भएका छन्। मुख्य पदमा विगतका उम्मेदवारहरू पुनः दोहोरिएका कारण निर्वाचन रोचक हुने विद्यार्थीहरूको अनुमान छ। निर्वाचनको मिति नजिकिँदै जाँदा विद्यार्थी र नेताहरूबिच चहलपहल बढेको छ। सफल चुनावको लागि स्ववियु निर्वाचन समितिले सबै पक्षलाई सहयोग गर्न आग्रह गरेको छ।