काठमाडौं, १ कात्तिक । श्रम, रोजगार तथा सामाजिक सुरक्षामन्त्री शेरबहादुर कुँवरले पार्टी र देश कसैको दम्भ र अहंकारबाट चल्न नसक्ने बताएका छन् । मंगलबार काठमाडौमा आयोजित एक कार्यक्रममा बोल्दै मन्त्री कुँवरले पार्टी र देश सहकार्य, शालिनता र एक अर्काको अस्तित्व स्वीकारबाट मात्र चल्ने बताए ।

उनले विज्ञान र प्रविधिको उपयोगबारे अछामका युवाहरूले पनि बुझेकाले त्यो बुझाइलाई आगामी मंसिर ४ गते हुने प्रतिनिधि र प्रदेशसभाको चुनावमा सत्ता गठबन्धनमा मत हालेर प्रटक गर्ने आफूले विश्वास लिएको बताए ।

सत्ता गठबन्धनबाट अछाम क्षेत्र नम्बर १ का साझा उमेदवारसमेत रहेका मन्त्री कुँवरले कस्ता उमेदवारले अछामी जनताको प्रतिनिधित्व गर्न सक्छन भन्ने कुरा जनतालाई थाहा भएकाले अछामी जनताले गठबन्धनलाई मत दिने विश्वास व्यक्त गरे ।

त्यस्तै, उनले भीम रावल राष्ट्रिय नेता तथा अछामी जनताको अभिभावक समेत रहेकाले एमालेले टिकट नदिएर सही वा गलत गर्यो भन्ने कुरा जनताले फैसला गर्ने बताए ।