काठमाडौँ, ३ चैत । आगामी वैशाख ३० का लागि तोकिएको स्थानीय तह निर्वाचनका सम्बन्धमा आज (बिहीबार) बिहान प्रधानमन्त्री शेरबहादुर देउवा, सत्ता साझेदार नेकपा माओवादीका अध्यक्ष प्रचण्ड र नेकपा एकीकृत समाजवादीका अध्यक्ष माधवकुमार नेपालबीच छलफल भएको छ।

माओवादी केन्द्रका अध्यक्ष प्रचण्डले आफूहरू तीन नेताबीच बिहान चुनावका विषयमा छलफल भएको जानकारी दिएका हुन्।

आज लुम्बिनी प्रदेशमा प्रेस सेन्टर नेपालले आयोजना गरेको पत्रकार सम्मेलनमा प्रचण्डले आफूहरू चुनावको तयारीमा होमिइसकेका बेला पनि बाहिरतिर चुनाव हुँदैन भन्ने हल्ला चलिरहेको बारे प्रधानमन्त्रीसँग कुरा राखेको बताए।

‘अहिलेको राष्ट्रिय राजनीतिक विषय भनेको करिब करिब अब निर्वाचनतिर केन्द्रति हुने र जनतासँग आआफ्ना एजेन्डा लिएर जाने काममा पार्टीहरु लागी नै सकेका छन्’, प्रचण्डले भने, ‘यद्यपि बाहिरफेर चैं निर्वाचन हुन्छ कि हुँदैन भन्ने पनि चर्चा चली नै राखेको छ। छ। आज बिहान मात्रै प्रधानमन्त्रीजीले मलाई बोलाउनुभाथ्यो, प्रधानमन्त्री, माधव नेपाल र म थियौं त्याँ। के हो यो निर्वाचनको हामी तयारीमा पूरै तागत लगाएर गइ नै सक्यौं, तर पनि बीचबीचमा निर्वाचन हुँदैन भन्ने हल्ला पनि चली नै राख्छ भन्दा प्रधानमन्त्रीले यो त चुनाव हुने दिन भोट हाल्ने दिन पनि भनिराख्छन्, मान्छेले, भोट हाल्ने दिन पनि हुन्छ कि हुन्न भोट हाल्न पाइन्छ कि पाइन्न भन्ने हुन्छ, नेपाली यस्तै हो भन्नुभभो।’