धनगढी, २४ भदौ । कैलालीका नेता पुष्करनाथ ओझालाई गरिएको कारबाही फिर्ता लिन माग गरिएको छ। नेपाली कांग्रेसका उपसभापति विमलेन्द्र निधिले पूर्व राज्यमन्त्री ओझामाथि गरिएको अनुशासनको कारबाही फिर्ता लिन माग गरेका छन्।

प्रधानमन्त्रीसमेत रहेका सभापति शेरबहादुर देउवालाई पत्र पठाएर उनले ओझामाथि गरिएको गरिएको कारबाही फिर्ता लिन माग गरेका हुन्।

‘पुस्करनाथ ओझालगायतका नेता–कार्यकर्तामाथि गरिएको अनुशासनको कारबाही फिर्ता लिनुपर्ने भन्दै पत्र पठाउनुभएको छ’, निधिका प्रेस सल्लाहकार रामजी दाहालले भने, ‘पत्रमा कारबाही फिर्ताको निर्णय गर्न अविलम्ब केन्द्रीय कार्यसमिति बैठक बोलाउन आग्रह गरिएको छ।’

यस्तै ओझा निकट कैलालीका काँग्रेस नेता तथा कार्यकर्ताले पनि कारबाही फिर्ता लिन माग गर्न थालेका छन्। ओझालाई ५ वर्षकका लागि पार्टीबाट निस्किासन गरिएको थियो।

उनीमाथि कैलालीमा कांग्रेस सभापति शेरबहादुर देउवा पत्नी आरजु देउवालाई चुनाव हराउन भूमिका खेलेको आरोप लागेको थियो।