धनगढी, २१ भदौ । नेपाली कांग्रेसको १४ औं महाधिवेशन अन्तर्गत भरखरै वडा अधिवेशन सम्पन्न भएको छ । यस्तै पालिका र जिल्ला अधिवेशनको तिथि नजिकिँदै जाँदा बझाङको बित्थडचिर गाउँपालिकामा कांग्रेसको चुनावी सरगर्मी बढेको छ ।

चुनावी सरगर्मी बढेसँगै गाउँपालिका सभापतिमा चक्र अधिकारीले आफ्नो उम्मेद्वारी घोषणा गरेका छन । सोमबार सुदूरपत्र संग कुरा गर्दै अधिकारीले कांग्रेसको पालिका सभापतिमा उठ्ने बताएका हुन ।

कांग्रेसको आसन्न १४ औँ महाधिवेशनमा आफु नै पालिका सभापतिका लागि उपयुक्त पात्र भएको जिकिर गर्दै सबैसंग सहमति र सहकार्य गरेर अगाडि बढ्ने बताए ।

उनले आफुलाई सभापति पद निर्वाचित गर्न सबैको सहयोगको अपेक्षा गरेको बताए । यस अघि लामो समय नेपाल प्रहरीमा सेवारत रहेका अधिकारीले झण्डै २८ महिना बित्थडचिरमै बसेर सेवा गरेका थिए ।

निष्ठापूर्वक जिम्मेवारी वहन गर्नसक्ने क्षमता भएका अधिकारी समाजसेवा र समन्वयात्मक भुमिकामा अगाडि देखिन्छन् । गाउँ वडादेखि टोलटोलसम्म पुगेर सबै नागरिकको मन विचार र उनीहरुको चाहना बुझेर नै आफु सभापतिका लागि उठ्न चाहेको बताए ।

कांग्रेसलाई सशक्त रुपमा अघि बढाउदै बित्थडचिरमा काङ्ग्रेसलाई बलियो बनाउदै अगाडि बढने उनको धारणा छ । पञ्चायतकाल देखि काँग्रेसको पारिवारिक पृष्ठभुमि भएका आधिकारीले नेपाल प्रहरीमै सेवारत हुँदा बित्थडचिरमा दोस्रो पुस्तामा फरक छवि बनाएका छन ।

आफुसंग पार्टी र संगठनप्रति दृढ संकल्प रहेको अधिकारीले बताए । नेपाल प्रहरीबाट सेवा निवृत्त भएपछि पार्टीको राजनितिमा सकृय छन ।