सुनसरीमा दर्दनाक दुर्घटना भएको छ। गएराति साढे १२ बजे एम्बुलेन्स र ट्रक एकआपसमा ठोक्किँदा ७ जनाको मृत्यु भएको छ ।

बिराटनगरको गोल्डेन अस्पतालबाट उदयपुर जाँदै गरेको एम्बुलेन्स र वीरगन्जबाट विराटनगर आउँदै गरेको ट्रक एकआपसमा ठोक्किएर उक्त दुर्घटना भएको जिल्ला प्रहरी कार्यालय सुनसरीका प्रवक्ता विनोद शर्माले जानकारी दिए।

उनका अनुसार ना२ख ९०८२ नम्बरको ट्रक र को१च ९०८२ नम्बरको एम्बुलेन्स एकआपसमा ठोक्किएको थियो। एम्बुलेन्समा एक महिला र अन्य ६ जना पुरुष सवार रहेका थिए।

मृतकहरूमा उदयपुर त्रियुगा नगरपालिका–१० बस्ने २८ वर्षीय राजेशकुमार दनुवार, ३४ वर्षीय दुर्गाधन राई, २८ वर्षीय टेकेन्द्र राई, ५० वर्षीय तुलाबहादुर राई, ३५ वर्षीय मुकेश राई, ३२ वर्षीय दिनेश रार्ई र ८५ वर्षीय शिवमाया राई रहेका छन्।

‘शिवमायाको चाहिँ विराटनगरमै निधन भएका कारण घर ल्याउँदै रहेछ,’ डिएसपी शर्माले भने, ‘अगाडि कुहिरो लागेको थियो, गाडीको लाइट कम भएका कारण दुर्घटना भएको हो।’

उनले दुर्घटनापछि बेपत्ता ट्रक चालकको खोजी कार्य भइरहेको जानकारी दिए। ‘हामीलाई एम्बुलेन्सबाट मान्छे निकाल्नै करिब ५ घण्टा लाग्यो,’ उनले भने।

कोसी गाउँपालिका–७ हरिपुरमा सो दुर्घटना भएको हो। घटनाको प्रकृति हेर्दा दुवै सवारी ‘ओभरस्पिड’ रहेको प्रहरीको अनुमान छ।

प्रहरीका अनुसार दुर्घटना भएपछि उछिट्टिएको एम्बुलेन्स सडकमा उल्टो बजारिएको थियो।