एजेन्सी । ताइवानमा भएको हेलिकप्टर दुर्घटनामा प्रधानसेनापति शेन यी मिङसहित ८ जनाको मृत्यु भएको छ । न्यू ताइपेई सहरको पहाडी क्षेत्रमा बिहीबार बिहान सैन्य हेलिकप्टर दुर्घटना भएको हो । दुर्घटनामा मृत्यु हुनेमा प्रधानसेनापतिसहित उच्च सैनिक अधिकारीहरु रहेको ताइवान न्यूज डट कमले जनाएको छ । दुर्घटनामा सख्त घाइते भएका ५ जनाको उपचार भइरहेको बताइएको छ । हेलिकप्टरमा ३ जना चालकदलका सदस्य र प्रधानसेनापति शेनसहित १० जना उच्च सैनिक अधिकृत सवार थिए । प्रधानसेनापति शेन ताइवानका वायुसेना प्रमुख पनि हुन् ।

सेनापति मिङ उत्तरपूर्वी क्षेत्रमा रहेका सैनिकहरूलाई भेट्न हेलिकप्टरमा जाने क्रममा दुर्घटना भएको हो । हेलिकप्टरको आकस्मिक अवतरणपछि उद्धार कार्य थालिएको थियो । हेलिकप्टरमा सवार केहीलाई जिवितै उद्धार गरिए पनि प्रधान सेनापति मिङसहित तीन जना बेपत्ता थिए । आगामी जनवरी ११ तारिखमा राष्ट्रपतीय तथा संसदीय चुनाव हुनुअघि यो दुर्घटना भएको हो। यो चुनावलाई बेइजिङसँगको सम्बन्धका बारेमा जनमतसंग्रहका रुपमा पनि हेरिएको छ। चुनावमा डेमोक्रेटिक प्रोग्रेसिभ पार्टीका तर्फबाट निवर्तमान राष्ट्रपति साई इङ वेन र कुमिन्ताङ पार्टीबाट हान कुओ युबीच प्रतिस्पर्धा हुने भएको छ ।