नेपाल आईस धनगढी फुटसल लिग अन्तर्गत आईतबा भएका लिग खेलपछि  सेमिफाईनल समिकरण पुरा भएको छ । भदौ ६ गतेदेखि सुरु भएको प्रतियोगिता अन्तर्गत लिग चरणका २४ खेल सम्पन्न भएका हुन् ।
समुह ए बाट सेन्चुरी वैंक नविल वैंक क्वाटरफाईनल पुगेको छ । ९  अंक सहित सेन्चुरी समुह विजेता र ६ अंक सहित नविल उपविजेता भएको हो । आईतबार भएको खेलमा सेन्चुरीले माछापुच्छेलाई १६—१ को अन्तरले हराएको हो । सेन्चुरीका लागि शिवराज पाठकले दोहोरो ह्याटिक सहित ७ गोल गरे । तपराज जोशीले ह्याटिक सहित ४ गोल र पदम कठायतले ह्याटिक गरे भने क्षितिज सिंहले २ गोल थपे । माछापुच्छेका लागि दिपक क्षेत्रीले एक गोल फर्काए । सेन्चुरीले यसअघि नविल र सिभिलाई हराएको थियो ।

समुह बी बाट कैलाश विकास वैंक विजेता र आईसी एसिया उपविजेता भएर अन्तिम आठमा पुगेको छ । दुईमा जित र एक बराबरी सहित कैलाश ७ अंक सहित विजेता बनेको हो । एकमा हार र दुईमा जित हात पारेर ६ अंक सहित उपविजेता बनेको हो । आईतबार भएको खेलमा कैलाशले प्रभु वैंकसँग ५—५ को बराबरी खेल्यो । कैलाशका लागि रमेश वोहोराले ह्याटिक गरे भने निशान थापाले दुई गोल गरे । प्रभुका लागि विनेश चौधरी र धुव्र भाटले दुई दुई गोल गरे भने आशिष रावलले एक गोल गरे । समुह बी मै प्रभु वैंकले सान्त्वना जित दर्ता गरेको छ । कैलाशसँग बराबरी गरेको प्रभुले आईतबार नै भएको खेलमा एनएमबी बैंकलाई ११—१ को अन्तरले हरायो । प्रभुका लागि आशिष रावलले ह्याटिक सहित ४ गोल गरे भने मनिष भण्डारीले ह्याटिक गरे । रवि जोशी र धुव्र भाटले दुई दुई गोल गरे । एनएमबीले अमन जोशीले एक गोल फर्काए ।

समुह सी बाट नवजीवन को अपरेटिभ ९ अंक सहित समुह विजेता भएर क्वाटरफाईनल पुग्यो भने वैंक अफ काठमाण्डौं ६ अंक सहित समुह उपविजेता भएर नकआउट चरणमा पुगेको छ । नवजीवनले आईतबार खेलेको दुवै खेलमा जित हासिल गर्यो । नवजीवनले पहिलो खेलमा सिटीजन वैंकलाई ६—१ ले हरायो । नवजीवनका लागि निर्मल बमले ह्याटिक गरे भने जीत थापाले दुई र देव वुढाले एक गोल गरे । सिटीजनका लागि तारामी जोशीले एक गोल फर्काए । नवजीवनले दोस्रो खेलमा नेपाल वंगलादेश वैंकलाई ६—० ले हरायो । नवजीवनका लागि टेक बोगटीले ह्याटिक गरे । जीत थापाले दुई र निर्मल बमले एक गोल गरे ।

समुह डीबाट कुमारी वैंक समुह विजेता भएर र सिद्धार्थ उपविजेता भएर क्वाटरफाईनल पुगेको छ । दुईमा जित र एकमा हार व्यहोरेका कुमारी सिद्धार्थ र सनराईजको समान ६ अंक भए पनि गोल अन्तरको आधारमा कुमारी विजेता र सिद्धार्थ उपविजेता भएको हो । आईतबार खेलेको दुबै खेलमा कुमारी जित हासिल गरेको छ । पहिलो खेलमा कुमारीले सनराईजलाई ३—१ ले हरायो । कुमारीका लागि किशोर भट्ट भाष्कर बोगटी र धर्मानन्द भट्टले एक एक गोल गरे । सनराईका लागि लक्ष्मी जोशीले एक गोल फर्काए । दोस्रो खेलमा कुमारीले जनता वैंकलाई १०—० ले हरायो । कुमारीका लागि किशोर भट्टले ह्याटिक सहित ४ गोल गरे भने गोपी न्यौपानेले ह्याटिक गरे । भाष्कर वोगटीले दुई र पुष्कर विष्टले एक गोल थपे ।

सार्वजनिक विदाका दिन खेल हुने प्रतियोगिताको विजेताले टफी सहित नगद ५० हजार पाउनेछ । उपविजेताले टफी सहित नगद २५ पाउनेछ । धनगढीको फ्ल्याटल्याण्ड  फुटसलको आयोजना र नेपाल खेलकुद खेलकुद पत्रकार मञ्च कैलालीको सहआयोजनामा गत भदौ ६ गतेदेखि नेपाल आईस धनगढी फुटसल लिग आयोजना भईरहेको छ ।