धनगढी: प्रमुख प्रतिपक्षी दल नेपाली कांग्रेसका सभापति शेरबहादुर देउवाले आफू प्रधानमन्त्री बन्न लालायित नभएको बताएका छन् ।

आइतबार आफ्नै निवास बूढानीलकण्ठमा श्रीराम श्रेष्ठद्वारा लिखित कृति ‘नेपाली जनजातीय संस्कार र संस्कृति’ विमोचन गर्दै सभापति देउवाले आफू प्रधानमन्त्री बन्न लालायित नभएको बताएका हुन् ।

यद्यपि कांग्रेसले नै नेतृत्व गर्नुपर्ने राजनीतिक परिस्थिति बनेमा पछि नहट्ने उनको भनाइ छ । माओवादी केन्द्रले सरकारलाई दिएको समर्थन फिर्ता नगरेकाले केपी शर्मा ओली नेतृत्वको वर्तमान सरकार बहुमतकै अवस्थामा रहेकाले बहुमतको सरकारसँग निहुँ नखोज्ने पनि देउवाले बताए ।

उनले आफू प्रधानमन्त्रीका लागि मरिमेटेर नलाग्ने पनि बताए । ‘प्रचण्डजीले सरकारलाई दिएको समर्थन फिर्ता नलिएकाले ओली सरकार बहुमतमै छ,’ उनले भने, ‘बहुमतको सरकार भएका बेलामा हामीले अरु कुनै सोच्ने कुरा छैन । त्यसकारण हामीले बहुमतकै सरकार मानेका छौँ । बहुमतको सरकारमा हामीले निहुँ खोज्ने कुरा छैन । हामीलाई प्रधानमन्त्री चाहियो भनेर मरिमेट्ने कुरा पनि छैन ।’

उनले राजनीतिक परिस्थिति बद्लिएर भोलि कांग्रेसले नै नेतृत्व गर्नुपर्ने अवस्था आए पछि नहट्ने स्पष्ट पारे । देउवाले वर्तमान राजनीति तरल अवस्थामा रहेको भन्दै स्थिति यतै जान्छ भनेर भन्न सकिने अवस्था नरहेको बताए ।