प्रहरीले अवस्थालाई नियन्त्रणमा लिन दुई राउण्ड अश्रुग्यास समेत प्रहार गरेको छ । जिल्ला सुरक्षा समितिको बैठक बसिरहँदा प्रहरी र प्रदर्शनकारीबीच झडप भएको हो । अवस्था नियन्त्रणमा लिनका लागि चितवन जिल्लामा रहेका प्रहरी कार्यालयबाट थप सुरक्षाकर्मीलाई भरतपुरमा तैनाथ गरिएको छ ।

यस्तै हेटौंडाबाट दंगा नियन्त्रण प्रहरीलाई समेत परिचालन गरिएको छ । रविका समर्थकहरुले शुक्रवारबाट नै चितवनका विभिन्न स्थानमा रविलाई रिहा गर्न माग गर्दै प्रदर्शन गरिरहेका छन् । शुक्रवार प्रहरी कार्यालयमा प्रदर्शनकारीहरुले ढुंगा हानेपछि हिजो केहीबेर बेर अवस्था असामान्य बनेको थियो ।

शुक्रवार जिल्ला अदालत चितवनले लामिछानेका साथै युवराज कँडेल र अस्मिता कार्कीलाई पाँच दिन थुनामा राख्न आदेश दिएको थियो । प्रहरीले १० दिनको म्याद मागेपनि जिल्ला अदालत चितवनका विनोदकुमार गौतमको इजलासले बिहीवारको मितिबाट थप पाँच दिन अनुसन्धानको थुनामा राख्न अनुमति दिएको थियो ।

साउन २० गते राति नारायणढस्थित पोखरा बसपार्कमा रहेको होटेल कंगारुको २०२ नम्बर कोठमा सञ्चारकर्मी शालिग्राम पुडासैनी मृत अवस्थामा फेला परेका थिए ।