आर्थिक वर्षको अनत्यमा विकाश निर्माणका काम गर्ने र भए गरेका कामको अनुगमन गर्ने वेला उनी सहितको टोली भ्रमणमा हिँडेको छ । कैलालीको घोडाघोडी नगरपालिका मेयर ममता प्रसाद चौधरीसहित ५० जनाको टोली कर्णाली, पाल्पा, पोखरा हुँदै मनाङ मुस्ताङ भ्रमणको लागी निस्केका छन् । भ्रमणको नाममा मेयरले ब्रह्मलुट मच्चाएको घोडाघोडी नगरपालिकाका स्थानीय लक्ष्मीप्रसाद भट्टराईको आरोप छ ।

उनले भने ‘जनताको घरमा जाने बाटो छैन, स्कुलमा पढाउने सरलाई स्कुल ले तलब दिन सकेको छैन, किसान मल नपाएर छटपटाईराछ, जनता औषधि नपाएर अकालमा ज्यान गुमाउन बाध्य छन् ।

तर मेयर चौधरी भने ७ लाख खर्च गर्ने गरी भ्रमणमा जान लागेको उनले बताए । गत वर्ष पनि नगरपालिकाले भ्रमणको नाममा ४÷५ लाख खर्च गरे पनि कुनै उपलब्धि नदेखिएको उनले बताए ।

चौधरी मेयरमा निर्वाचित भएर आएको २ वर्ष बित्दा पनि विकासको सट्टा अराजक गतिविधिमा लागेको आरोप उनको छ । घोडाघोडी नगरपालिकामा चौधरीले राणा शासन लाद्न खोजेको भट्टराईले बताए ।

नियमित वार्षिक कार्यक्रम अनुसार आफूहरू भ्रमणमा निस्केको नगर प्रमुख ममता प्रसाद चौधरीले बताए । ७ दिनको ७ लाख खर्च गरिने भन्ने आरोप झुटो रहेको भन्दै उनले आफ्नो बचाउ गरे ।

कर्णाली, पाल्पा, पोखरा हुँदै मनाङ मुस्ताङ पुग्ने ५ दिने भ्रमण रहेको भन्दै उनले आवश्यकता अनुसार खर्च हुने बताएका छन् । सिकाइका लागी भ्रमण थालेको भन्दै नगर प्रमुख चौधरीले भ्रमण उपलब्धि मूलक बन्ने दाबी गरे ।