काठमाडौं, २१ साउन /  गृहमन्त्री सुधन गुरुङले सांसदहरूलाई सदनमा अब निर्मला पन्त प्रकरणका प्रश्न नसोध्न आग्रह गरेका छन् । आज राष्ट्रियसभाको बैठकमा सांसद विष्णुबहादुर विश्वकर्माले यो प्रकरणबारे प्रश्न सोधेका थिए ।

उनले यो विषय एकदमै संवेदनशील भएको भन्दै प्रश्नकर्ता सांसदलाई भने, ‘हजुरहरू सत्तामा हुँदा किन नगर्नुभएको ? अहिले हामीलाई आएर त्यो भारी बोकाउने ? संवेदनशील विषयलाई हामीले जहिले पनि एउटा आमाको घाउलाई कोट्याएको कोट्याई गर्ने ? सदनबाट उहाँलाई पीडा दिइराख्ने हो?

उनले यसको चरणबद्ध रूपमा सूक्ष्म तरिकाले अनुसन्धान भइरहेको भन्दै रिजल्ट चाँडै दिने बताए ।

उनले थपे, ‘तपाईँको कोही मान्छे बित्दै गर्दा तपाईँलाई दिनका दिन सम्झाउँदा तपाईँलाई मज्जा आउँछ होला त ? तपाईँलाई मनमा शान्ति हुन्छ होला त ? यो पनि म हजुरलाई प्रश्न गर्न चाहन्छु। म धेरै कुरा बोल्न सक्दिनँ । बोल्दा उचित हुँदैन । अबका दिनमा यो प्रश्न नउठाइदिनुहुन आग्रह गर्न चाहन्छु ।’

उनले यो प्रकरणमा प्रश्न गर्नुपर्ने भए आफूलाई व्यक्तिगत रूपमा आएर सोध्न आग्रह गरे। आमाको पीडामाथि मलम लगाउनुको साटो बारम्बार छोरीको सम्झनालाई कोट्याइराख्न आफ्नो नैतिकताले नदिने बताए ।

उनले थपे, ‘म माफी पनि माग्न चाहन्छु । यसको बारेमा मैले राम्रोसित उत्तर दिन सक्दिन होला, तर हजुरले एक छिन पछि मलाई सोध्दा म यसको बारेमा विस्तृत जानकारी दिन सक्छु ।’

उनले सरकार शान्ति सुरक्षा कायम गर्नका लागि निरन्तर लागिरहेको समेत बताए । देशमा हुने हत्या, हिंसा, बलात्कार लगायतका अपराधहरूको अनुसन्धान चरणबद्ध रूपमा गरिरहेको जानकारी गराए।