धनगढी , २० साउन / सरकारको निर्णयअनुसार भजनी नगरपालिका-५ स्थित पृथ्वीपुर छोटी भन्सार कार्यालय बन्द गरिएपछि स्थानीयवासी आन्दोलनमा उत्रिएका छन् । भन्सार पुनर्स्थापनाको माग गर्दै स्थानीय नागरिक, भजनी उद्योग वाणिज्य सङ्घ तथा विभिन्न सरोकारवाला पक्षको सहभागितामा संघर्ष समिति नै गठन गरी भन्सार कार्यालय पुनः सञ्चालनको माग गरिरहेका छन्।

पृथ्वीपुर भन्सार पुनर्स्थापना सङ्घर्ष समितिका संयोजक अमृत केसीले सरकारले गरेको भन्सार बन्द गर्ने निर्णय त्रुटिपूर्ण रहेको बताएका छन्। उनका अनुसार भजनी नगरपालिका, जोशीपुर गाउँपालिका, कैलारी गाउँपालिका, घोडाघोडी नगरपालिका लगायतका स्थानीय तहका नागरिकले यही नाकामार्फत दैनिक उपभोग्य वस्तुको आयात-निर्यात गर्दै आएका थिए। भन्सारबाट उल्लेखनीय राजस्वसमेत संकलन भइरहेकाले कार्यालय बन्द गर्नु स्थानीय हितविपरीत भएको उनको भनाइ छ।

भन्सार बन्द भएपछि सङ्घर्ष समितिले स्थानीय तहका प्रमुखहरूलाई ध्यानाकर्षण गराउनुका साथै सम्बन्धित भन्सार कार्यालयमा ज्ञापनपत्रसमेत बुझाइसकेको जनाएको छ। यसै विषयमा छलफल गर्न भजनी नगरपालिका, बर्दगोरिया गाउँपालिका, कैलारी गाउँपालिका र घोडाघोडी नगरपालिकाका प्रमुखसहितको टोली बिहीबार काठमाडौं जाने तयारीमा रहेको संयोजक केसीले जानकारी दिए।

उनका अनुसार पृथ्वीपुर भन्सार कार्यालय सत्ति भन्सार कार्यालयबाट करिब २०–२२ किलोमिटरको दूरीमा रहेको छ। सत्ति भन्सारबाट करिब ७ किलोमिटरमै अर्को भन्सार सञ्चालनमा रहँदा पृथ्वीपुर भन्सार मात्र बन्द गर्नुको औचित्यमाथि स्थानीयले प्रश्न उठाएका छन्।

सङ्घर्ष समितिले अब छोटी भन्सार पुनः सञ्चालन मात्र नभई पृथ्वीपुरमा मूल भन्सार कार्यालय नै स्थापना गर्नुपर्ने माग अघि सारेको छ। “अब हामीलाई कुनै पनि हालतमा मूल भन्सार कार्यालय नै चाहिन्छ,” संयोजक केसीले भने।

स्थानीयका अनुसार वि.सं. २०२२ सालदेखि सञ्चालनमा रहेको पृथ्वीपुर भन्सार कार्यालयलाई एकाएक बन्द गर्नु नियमसंगत नभएको र यसले स्थानीय व्यापार, राजस्व संकलन तथा जनजीवनमा प्रत्यक्ष असर पारेको उनीहरूको भनाइ रहेको छ।