धनगढी १७ साउन/ कैलालीको भारतसँग जोडिएका सीमा नाकाबाट नेपाल प्रवेश गर्न अनिवार्य आधिकारिक परिचयपत्र देखाएर मात्र प्रवेश गर्नुपर्ने व्यवस्था लागू भएको छ । हालको संवेदनशील अवस्थालाई ध्यानमा राख्दै भारतसँग जोडिएका सीमामा यस्तो कडाई गरेको हो ।
जिल्ला प्रशासन कार्यालय कैलालीको आह्वानमा प्रमुख जिल्ला अधिकारी हिरालाल रेग्मीको अध्यक्षतामा कैलालीका बिभिन्न नागरिक समाज, धर्मगूरु, समुदायकका अगुवाहरुको उपस्तीथिको बैठकमा सो निर्णय गरिएको हो ।
पछिल्लो समय देशका केही जिल्लामा देखिएका धार्मिक तनाव र सामाजिक असहिष्णुतालाई मध्यनजर गर्दै कैलालीमा शान्ति, सुरक्षा र आपसी सद्भाव कायम राख्न विशेष सतर्कता अपनाउने निर्णय गरिएको हो ।
साथै कुनै पनि धार्मिक समुदायको भावना आहत हुने गतिविधि, उत्तेजक अभिव्यक्ति, हतियार, लाठी, भाला लगायतका सामग्री प्रदर्शन तथा सामाजिक सञ्जालमार्फत धार्मिक द्वष फैलाउने कार्य नगर्न सबैलाई आग्रह गरिएको कैलाली जिल्लाका प्रमुख जिल्ला अधिकारी रेग्मीले जानकारी दिए ।
निर्णयअनुसार सबै स्थानीय तहमा धार्मिक तथा सामाजिक सद्भाव समन्वय समिति गठन वा पुनर्गठन गरिनेछ । कुनै एक धार्मिक समुदायको मात्र प्रतिनिधित्व हुने गरी सभा, जुलुस वा ¥याली नगर्न तथा अर्काे समुदायको धार्मिक आस्थामा असर पुग्ने गतिविधि नगर्न पनि आग्रह गरिएको छ ।
