धनगढी, १५ साउन / भारतको उत्तर प्रदेशस्थित ३९ औँ वाहिनी, सशस्त्र सीमा बल (एसएसबी) पलियाका कमान्डेन्ट रबीन्द्र कुमार राजेश्वरीको सेवा निवृत्तिको अवसरमा आयोजित सम्मान तथा बिदाइ कार्यक्रममा नेपाली टोली सहभागी भएर उहाँलाई शान्ति र मैत्रीको प्रतीक भगवान गौतम बुद्धको तस्बिर हस्तान्तरण गर्दै सम्मान गरेको छ।
वाहिनी मुख्यालयमा आयोजित विशेष कार्यक्रममा युवा व्यवसायी शुभ ठाकुरको नेतृत्वमा नेपालबाट गएको टोलीमा नेपाल–भारत मैत्री संघ कैलालीका अध्यक्ष राजिव गुप्ता, नेपाल पत्रकार महासंघ कैलाली शाखाका अध्यक्ष श्रवण देउवा, प्रदेश सदस्य भिमबहादुर चौधरी तथा पत्रकार लवदेव धामी सहभागी थिए। नेपाली प्रतिनिधिमण्डललाई कार्यक्रमका आयोजकले विशेष अतिथिका रूपमा आमन्त्रण गरेका थिए।
कार्यक्रमका क्रममा नेपाली टोलीले सेवा निवृत्त कमान्डेन्ट राजेश्वरीलाई बुद्धको तस्बिर प्रदान गर्दै नेपाल–भारतबीचको मित्रता, सद्भाव र सहकार्य अझ सुदृढ हुँदै जाओस् भन्ने शुभकामना व्यक्त गरेको थियो। त्यसपछि आयोजित सम्मान तथा बिदाइ समारोह तथा विशेष रात्रिभोजमा नेपाली टोली पनि सहभागी भएको थियो।
समारोहलाई सम्बोधन गर्ने वक्ताहरूले कमान्डेन्ट राजेश्वरीले आफ्नो कार्यकालमा सीमा सुरक्षा सुदृढीकरण, संगठनात्मक अनुशासन, नेतृत्व विकास तथा नेपाल–भारत सीमावर्ती क्षेत्रमा समन्वय र सहकार्यलाई प्रभावकारी बनाउन उल्लेखनीय योगदान पुर्याएको बताए। उहाँको नेतृत्वमा वाहिनीले सुरक्षा र सामाजिक उत्तरदायित्वसँग सम्बन्धित विभिन्न कार्यक्रम सफलतापूर्वक सञ्चालन गरेको पनि उल्लेख गरिएको थियो।
सेवा निवृत्त कमान्डेन्ट राजेश्वरीले आफ्नो कार्यकालमा साथ, सहयोग र विश्वास गर्ने सम्पूर्ण अधिकारी, जवान तथा कर्मचारीप्रति आभार व्यक्त गर्दै राष्ट्र सेवामा बिताएका क्षणहरू जीवनकै सबैभन्दा गौरवपूर्ण सम्झना रहने बताए। उनले संगठनको आगामी सफलताको शुभकामना पनि व्यक्त गरे।
कार्यक्रमको अन्त्यमा कमान्डेन्ट राजेश्वरीलाई सम्मानपत्र, मायाको चिनो, पुष्पगुच्छा तथा शुभकामनासहित सम्मानपूर्वक बिदाइ गरिएको थियो। कार्यक्रममा पलियाका भाजपा नेता रवि गुप्तालगायत एसएसबीका वरिष्ठ अधिकारी, जवान तथा कर्मचारीहरूको पनि उल्लेखनीय उपस्थिति रहेको थियो।
