धनगढी , १४ साउन /  सहिद दशरथ चन्द स्वास्थ्य विज्ञान विश्वविद्यालयमा सञ्चालित गेटा अस्पतालमा एक वर्षमा ४४ हजार ११० जनाले ओपिडी सेवा लिएका छन् । २०८१ कार्तिक १ गते देखि सञ्चालित यस अस्पतालमा आर्थिक वर्ष २०८२/०८३ मा उक्त सङ्ख्यामा ओपिडी सेवा लिएका हुन ।

ओपिडी सेवा लिने मध्ये जनरल मेडिसिनका १० हजार २०५ जना, अर्थोपेडिक्स (हाडजोर्नी) का ७ हजार ३०९, कार्डियोलोजी (मुटुरोगी) का ३ हजार ८५१ जनाले सेवा लिएको अस्पतालका सूचना अधिकारी नैन सिंह कार्कीले बताए । यस्तै एक वर्षको अवधिमा जनरल सर्जरीका ३ हजार २४३, इएनटी ( नाक कान घाटी) का ३ हजार १८१, स्त्री तथा प्रसूति रोगका ३ हजार २४३, छाला रोगका २ हजार ९३६, बाल रोगका २ हजार ३२३, मानसिक रोगका ८३३, दन्त सेवाका १ हजार ६८७, आँखाका ४७४, युरोलोलीका २२३, सामान्य ओपिडीमा १ हजार ५६४ जनाले सेवा लिएका छन् । सूचना अधिकारी कार्कीका अनुसार एक वर्षको अवधिमा इमर्जेन्सीमा २ हजार ८३८ जना गरी जम्मा जम्मा ४४ हजार ११० जनाले सेवा लिएका छन् ।

यस्तै अस्पतालमा एक वर्षको अवधिमा ९६७ जनाको (इनडोर) भर्ना गरेर सेवा दिइएको छ । अस्पतालमा आएका १९ हजार ९५१ जनाले प्रयोगशाला परीक्षण सेवा, ११ हजार ४६७ जनाले एक्स–रे सेवा, ४ हजार २२४ जनाले अल्ट्रासाउन्ड सेवा, २ हजार ५७५ जनाले इको सेवा, ५ हजार ७३१ जनाले इसीजी सेवा, १३३ जनाले म्यामोग्राफी सेवा र २४५ जनाले इन्डोस्कोपी सेवा लिएका छन् ।

अस्पतालमा ४५२ जनाको शल्यक्रिया गरिएको छ । जसमा ७३ जनाको ठुलो शल्यक्रिया, १८३ जनाको मध्यम शल्यक्रिया, १९६ जनाको सानो शल्यक्रिया गरिएको अस्पतालका सूचना अधिकारी कार्कीले बताए । यस्तै अस्पतालमा २ हजार १९५ जनाको फिजियोथेरापी, ४०२ जनाको पाठेघरको मुखको क्यान्सर स्क्रिनिङ गरिएको छ । एक वर्षको अवधिमा ४९ हजार ७८२ जनाले अस्पतालको फार्मेसीबाट सेवा लिएका छन् ।

गेटा अस्पताल ५० शय्या जनरल बेड सँगै १० बेडमा आइसियु सेवा सञ्चालनमा रहेको छ । अस्पतालमा सुविधा सम्पन्न ओटी सँगै प्रयोगशाला भए पनि बिरामीको चाप भने अझै अपेक्षाकृत रूपमा बढ्न सकेको छैन ।

सरकारले असार २४ गते मन्त्रिपरिषद् बैठकबाट गेटा अस्पताललाई सहिद दशरथ चन्द स्वास्थ्य विज्ञान विश्वविद्यालयको शिक्षण अस्पतालका रूपमा सञ्चालन गर्ने अनुमति दिइसकेको छ । सरकारले गेटामा यसै वर्ष एमबिबिएस लगायतका शैक्षिक कार्यक्रम सँगै ३ सय शय्याको अस्पताल पनि सञ्चालन गर्ने तयारी गरिएको छ । जसका लागि गेटामा हालै सरकारले उपकुलपति, रजिस्ट्रार नियुक्त गरिसकेको छ भने अन्य कर्मचारी पनि नियुक्तिको प्रक्रियामा रहेको छ ।

विश्वविद्यालयमा शैक्षिक कार्यक्रम सञ्चालनका लागि यस वर्ष सरकारले २ अर्ब ५३ करोड रकम पनि विनियोजन गरिसकेको छ । कैलाली क्षेत्र नम्बर ४ का सांसद खेम राज कोइरालाले गेटामा विश्वविद्यालय सञ्चालनका लागि यस क्षेत्रका सबै सरोकारवालाहरू सँगको सहकार्यमा काम अघि बढिरहेको बताए । उनले चालु आर्थिक वर्षको लागि बजेट सुनिश्चितता भइसकेकाले यसै शैक्षिक सत्रबाट ४ विधामा अध्यापन सुरु हुने बताए । उनले निकट भविष्यमा एमडीको पनि अध्यापन गर्ने तयारी गरिएको बताए ।