धनगढी, ११ साउन/स्वास्थ्य क्षेत्र सुधार तथा शहीद दशरथचन्द स्वास्थ्य विज्ञान विश्वविद्यालयसँग सम्बन्धित माग राख्दै धनगढीमा अनशनरत वरिष्ठ चिकित्सक डा. गोविन्द केसीले आफ्नो अनशन तोडेका छन् ।

डा. केसी बिहीबार (साउन ७) देखि कैलालीको धनगढीमा २४औँ अनशनमा बसेका थिए । स्वास्थ्य अवस्था जटिल बनेपछि शनिबार (साउन ९) देखि उनलाई सेती प्रादेशिक अस्पतालमा चिकित्सकको निगरानीमा राखिएको थियो । सरकारसँग भएको तीनबुँदे सहमतिपछि डा. केसीले बाजुराको गौमुल गाउँपालिका-२ निवासी ४२ वर्षीय चक्रबहादुर धामीको हातबाट जुस पिएर अनशन तोडेका हुन् ।

सहमतिअनुसार शहीद दशरथचन्द स्वास्थ्य विज्ञान विश्वविद्यालयका रजिस्ट्रार डा. भीमबहादुर चन्दको राजीनामाको मागबाट डा. केसी पछि हटेपछि सहमतिको वातावरण बनेको हो । यसअघि अनशनका क्रममा डा. केसीको स्वास्थ्य अवस्था जटिल बनेपछि उनलाई सेती प्रादेशिक अस्पतालको आईसीयूमा राखेर उपचार तथा निगरानी गरिएको थियो । चिकित्सकहरूले उनको रक्तचाप घट्नु, रगतमा चिनीको मात्रा अत्यन्त कम हुनु तथा अन्य स्वास्थ्य समस्या देखिएको बताएका थिए ।

अनशन अन्त्यसँगै धनगढीमा केही दिनदेखि जारी आन्दोलन पनि तत्कालका लागि टुंगिएको छ । अब सहमतिमा उल्लेख गरिएका विषयको कार्यान्वयनतर्फ सरकार र सम्बन्धित निकायको ध्यान केन्द्रित हुने अपेक्षा गरिएको छ ।