धनगढी,  २५ जेठ  / ऐश्वर्य बहुमुखी क्याम्पस, स्वतन्त्र विद्यार्थी युनियन (स्ववियु) द्वारा आयोजित एएमसी फुट्सल कप-२०८३ सम्पन्न भएको छ। दुई दिनसम्म सञ्चालन भएको प्रतियोगितामा आयोजक ऐश्वर्य बहुमुखी क्याम्पसले उत्कृष्ट प्रदर्शन गर्दै उपाधि जित्न सफल भएको छ भने कैलाली बहुमुखी क्याम्पस उपविजेता भएको छ।

जेठ २४ गतेदेखि सुरु भएको प्रतियोगिता जेठ २५ गते सम्पन्न भएको हो। प्रतियोगितामा विभिन्न क्याम्पसका गरी १७ टोलीको सहभागिता रहेको थियो। खेलमार्फत विद्यार्थीबीच आपसी सद्भाव, मित्रता र खेलकुद संस्कृतिको विकास गर्ने उद्देश्यले प्रतियोगिता आयोजना गरिएको आयोजक  ऐश्वर्य बहुमुखी क्याम्पस स्वतन्त्र विद्यार्थी युनियनका अध्यक्ष दीपक भट्टले बताए।

प्रतियोगिताको विजेता बनेको ऐश्वर्य बहुमुखी क्याम्पसले नगद रु. ५५ हजार ५ सय ५५, ट्रफी, मेडल तथा प्रमाणपत्र प्राप्त गरेको छ। त्यसैगरी उपविजेता कैलाली बहुमुखी क्याम्पसले रु. २२ हजार २ सय २२ नगदसहित ट्रफी, मेडल र प्रमाणपत्र प्राप्त गरेको छ।

आयोजक ऐश्वर्य बहुमुखी क्याम्पस स्वतन्त्र विद्यार्थी युनियनका अध्यक्ष भट्टले प्रतियोगिता सफलतापूर्वक सम्पन्न भएको जानकारी दिँदै सहभागी सबै टोली, खेलाडी, सहयोगीप्रति आभार व्यक्त गरेका छन्।