धनगढी, ३० असार /  ‘पूर्ण खोप जिल्ला सुनिश्चितता तथा दिगोपना घोषणा कार्यक्रममा बोल्दै महिला स्वास्थ्य स्वयंसेविका अम्विका भण्डारीले स्थानीय तहहरूबाट आफूहरूले पाउँदै आएको ज्याला कटौती गरेको बताएकी छन् । कैलालीको सन्दर्भमा विशेष गरी प्रदेशकै एक मात्र उपमहानगरपालिका धनगढीले महिला स्वयंसेवीकाको योगदानको उपयुक्त कदर नगरेको स्वयम् सेविका भण्डारीले बताइन्।

।“हामी महिला स्वास्थ्य स्वयंसेविका ४ सय रुपैयाँमा काम गरिरहेका छौं, आफ्नो काम गर्ने हरुलाई १ हजार रुपैयाँ पारिश्रमिक दिन बाध्य छौं  उनले भनिन्।

“स्थानीय सरकारले तोकेको रकमसमेत नदिई कटौती गरिदिन्छन्, हामीले आवाज उठाउँदा पनि हाम्रो आवाजमा चासो दिइएको छैन । ,”  भण्डारीले आफुहरुसँग शिक्षकहरुको जस्तो आन्दोलन गर्न सक्ने क्षमता नभएकाले पनि महिला स्वास्थ्य स्वयंसेवीकालाई सरकारले सामान्य रुपमा लिएको भन्दै  उनले आक्रोस पोखिन्।

सम्पुर्ण स्वयंसेविकाको तर्फबाट मञ्चमा पुगेकी भण्डारीले २०४५ सालदेखि योगदान दिँदै आएका महिला स्वयंसेविकालाई विदाई गर्दा समेत उचित राहत सहित विदाई गरिनुपर्ने माग समेत राखेकी थिइन् ।

उक्त कार्यक्रममा कैलाली जिल्लाका १३ वटै स्थानीय तहबाट १–१ जना महिला स्वास्थ्य स्वयंसेविकालाई सम्मानसमेत गरिएको थियो।

कार्यक्रम जिल्ला पूर्ण खोप समन्वय समिति कैलाली तथा स्वास्थ्य कार्यालय कैलालीको आयोजनामा सम्पन्न भएको थियो।

स्थानीय स्रोतको उपयोग, स्वामित्व र सहभागिता; पूर्ण खोप सुनिश्चितता – हाम्रो प्रतिबद्धता’ भन्ने नारासहित कैलालीको धनगढीमा पूर्ण खोप जिल्ला सुनिश्चितता तथा दिगोपना घोषणा सभा सम्पन्न भएको छ।

असार ३० गते सोमबार, स्वास्थ्य तालिम केन्द्र धनगढीमा सम्पन्न कार्यक्रममा सुदूरपश्चिम सरकारका सामाजिक विकास मन्त्री मेघराज खड्का, मन्त्रालयका सचिव , कर्मचारी, कैलाली जिल्लाका प्रमुख गोगन बहादुर हमाल, १३ वटै स्थानीय तहका जनप्रतिनिधिहरु, स्वास्थ्यकर्मी, स्वयंसेविका र सरोकारवाला निकायका प्रतिनिधिहरूको उपस्थिति रहेको थियो।