धनगढी, १९ साउन /  सञ्चारकर्मी तथा सुदूरपश्चिम प्रदेशका रक्तदान सद्भावना दूत दीपक उपाध्यायले ११४ औँ पटक रक्तदान गरेका छन्। उपाध्यायले भजनी नगरपालिकाको कुटी निवासी ६ वर्षीय बालक निशान्त राजीको उपचारका लागि आवश्यक रगत उपलब्ध गराउन रक्तदान गरेका हुन्।

रक्तदानपछि उनले बालक निशान्तको शीघ्र स्वास्थ्य लाभको कामना गर्दै सबैलाई नियमित रक्तदान गर्न आग्रह गरेका छन्। उनले ‘बचाऔँ कसैको ज्यान, आउनुस् गरौँ रक्तदान’ भन्ने सन्देशसहित रक्तदानले कसैको जीवन बचाउन सक्ने भएकाले स्वस्थ व्यक्तिले नियमित रूपमा रक्तदान गर्नुपर्ने बताए।

सुदूरपश्चिम प्रदेशका रक्तदान सद्भावना दूतसमेत रहेका उपाध्यायले विगत लामो समयदेखि निरन्तर रक्तदान गर्दै रक्तदान अभियानमा सक्रिय भूमिका निर्वाह गर्दै आएका छन्। उनका अनुसार रक्तदान मानवताको सबैभन्दा ठूलो सेवामध्ये एक भएकाले सबै नागरिकलाई रक्तदान अभियानमा सहभागी हुन आवश्यक छ।