धनगढी, १६ साउन / सुदूरपश्चिम तथा मध्यपश्चिम क्षेत्रको मौलिक संस्कृतिमा आधारित नयाँ देउडा गीत ‘सुवा तेरा निम्ति’ बजारमा सार्वजनिक भएको छ। वीर बोहराको प्रस्तुतिमा तयार पारिएको यस गीतले सार्वजनिक भएसँगै दर्शक तथा श्रोताको राम्रो माया पाइरहेको छ।

लोकप्रिय गायक कुलेन्द्र परियार, प्रवेश दाहाल र चर्चित गायिका रेखा जोशीको सुमधुर स्वरमा सजिएको यस गीतमा शेर बिष्टका उत्कृष्ट शब्द सिर्जना रहेका छन्। गीतको संगीत संयोजन/लय संगीत कुलेन्द्र परियार स्वयंले गरेका हुन् भने कृष्णा बजुरालीले गीतको एरेन्ज गरेका छन्। ‘द म्युजिक इरा’  स्टुडियोमा यो गीत रेकर्ड गरिएको हो।

भीम थापाको निर्देशनमा तयार पारिएको आकर्षक भिडियोमा वीर बोहरा, बबी सिंह ठकुरी, भरत बोहरा र गोरख साउ लगायतका कलाकारहरूको जीवन्त अभिनय देख्न सकिन्छ। भिडियोलाई अमृत उपाध्यायले छायांकन गरेका हुन् भने प्रबिन रेश्मी मगरले सम्पादन गरेका छन्। निशा बोहराले मेकअप सम्हालेकी छिन्। खप्तड फिल्म्सले भिडियोको पोस्ट प्रोडक्सन गरेको हो।

देउडा संगीतप्रेमीहरूका लागि विशेष कोसेलीका रूपमा ल्याइएको यो गीत ‘वी बोहरा अफिसियल’ युट्युब च्यानल मार्फत सार्वजनिक गरिएको छ। सुदूरपश्चिमको मौलिक पन र आधुनिक दृश्य संयोजनका कारण भिडियोलाई दर्शकहरूले निकै रुचाएका छन्।