धनगढी, ११ साउन/कैलालीको धनगढी उपमहानगरपालिका–७, मनेहरास्थित बेहडाबाबा मेटल उद्योगले सामाजिक उत्तरदायित्वअन्तर्गत बेहडा बाबा मन्दिरलाई दुई थान फलामका खाट (चारपाई) सहयोग गरेको छ।

सोमबार आयोजित कार्यक्रममा उद्योगका प्रतिनिधिले मन्दिर व्यवस्थापन सेवा समितिका अध्यक्ष खेमबहादुर चन्दलाई खाट हस्तान्तरण गरेका हुन्। उद्योगले आफ्नो आम्दानीको केही हिस्सा सामाजिक तथा धार्मिक क्षेत्रमा योगदान गर्ने उद्देश्यले सहयोग गरिएको जनाएको छ। करिब एक वर्षअघि स्थापना भएको उद्योगले उत्पादन गर्दै आएको फलामका खाट बलियो बनावट, आकर्षक डिजाइन, टिकाउपन र किफायती मूल्यका कारण उपभोक्तामाझ लोकप्रिय बन्दै गएको उद्योगकी व्यवस्थापक अनु चौधरीले बताइन्।

उनका अनुसार उद्योगमा उत्पादन हुने खाट सबै मौसमका लागि उपयुक्त छन्। गर्मीयाममा आँगन, बरन्डा तथा छतमा सहज रूपमा प्रयोग गर्न सकिने यी खाट जाडोयाममा घरभित्र पनि उत्तिकै उपयोगी हुनेछन्। गुणस्तरीय सामग्री प्रयोग गरिएकाले उत्पादनप्रति उपभोक्ताको विश्वास निरन्तर बढ्दै गएको उनले उल्लेख गरिन्।

व्यवस्थापक चौधरीले उद्योगले हासिल गरेको सफलता ग्राहकको विश्वास र बेहडा बाबाको आशीर्वादको परिणाम भएको बताउँदै व्यापारलाई नाफामुखी मात्र नभई समाजप्रति उत्तरदायी बनाउने लक्ष्यका साथ अघि बढिरहेको जानकारी दिइन्। “हाम्रो लक्ष्य गुणस्तरीय र किफायती फलामका खाट हरेक घरपरिवारसम्म पुर्‍याउनुका साथै सामाजिक तथा धार्मिक गतिविधिमा निरन्तर योगदान गर्नु हो,“ उनले भनिन्।

उद्योगका अनुसार उचित मूल्य, मजबुत संरचना र टिकाउ गुणस्तरका कारण यसको उत्पादन सामान्य परिवारदेखि होटल, होस्टेल, अस्पताल तथा विभिन्न संस्थासम्म प्रयोग भइरहेको छ। खाट हस्तान्तरण कार्यक्रममा बेहडा बाबा मन्दिर व्यवस्थापन समितिका अध्यक्ष खेमबहादुर चन्द, सदस्य तिलक बोहरा, रमेश भट्टलाई उद्योगले हस्तान्तरण गरेको हो ।