धनगढी, ३ साउन/ कैलाली प्रहरीले अनलाइन सफ्टवेयर प्रयोग गरी अवैध मुद्रा कारोबारमा संलग्न रहेको आरोपमा धनगढीमा दुई जना भारतिय सहित ९ जनालाई पक्राउ गरेको छ ।
जिल्ला प्रहरी कार्यालय कैलालीका अनुसार धनगढी उपमहानगरपालिका–४ स्थित एक घरमा फ्ल्याट भाडामा लिएर युवायुवतीलाई राखी सफ्टवेयरमार्फत अवैध मुद्रा कारोबार भइरहेको भन्ने सूचनाका आधारमा प्रहरी टोलीले खानतलासी आधारमा पक्राउ गरेको कैलाली जिल्ला प्रहरी कार्यालयका सहप्रबक्ता प्रहरी निरिक्षक कैलाशसिह बिष्टले जानकारी दिए ।
पक्राउ पर्नेमा कैलालीका प्रेम बहादुर साउद, उदयपुरका दिपिन मगर, भारतको दिल्लीका टिंकुमार सूर्यवंशी, हरियाणाका दीपक कुमार जाट, चितवनका जितेन्द्र कँडेल, ललितपुरका राजकुमार गौतम, काठमाडौंका रावन चुडाल, झापाका हरि प्रसाद चापागाईं तथा धनगढीका ज्ञानेन्द्र ढकाल रहेका छन् ।
कारोबारमा संलग्न रहेको आशंकामा ९ जनालाई पक्राउ गरी अनुसन्धान अघि बढाइएको प्रहरीले जनाएको छ । प्रहरीले पक्राउ परेकाहरूलाई जिल्ला अदालत कैलालीबाट म्याद थप गरी थप अनुसन्धान भइरहेको जनाएको छ । पक्राउ परेकाहरूबाट बरामद भएका सामग्री तथा कारोबारको परिमाणबारे प्रहरीले बिस्तृत बिवरण अनुसन्धान गरिरहेको कैलाली जिल्ला प्रहरी कार्यालयका सहप्रबक्ता प्रहरी निरिक्षक बिष्टले बताएका छन् ।
