धनगढी, ५ असार  /  सुदूरपश्चिम प्रदेश सरकारले आगामी आर्थिक वर्ष २०८३/८४ का लागि ल्याएको बजेटप्रति सत्ता साझेदार दलभित्रै असन्तुष्टि देखिएको छ । नेकपा एमालेले बजेटमाथि संशोधन प्रस्ताव दर्ता गर्ने तयारी गरेको छ । तीन मन्त्री र एक राज्यमन्त्रीसहित सरकारमा रहेको एमालेको संसदीय दलको कार्यालयमा बिहीबार बसेको बैठकले बजेटका विभिन्न पक्षमा छलफल गर्दै संशोधन प्रस्ताव दर्ता गर्ने निर्णय गरेको एमाले स्रोतले जनाएको छ। सरकारद्वारा बजेट प्रस्तुत भएलगत्तै संशोधन दर्ता गर्ने निर्णय गरिएको स्रोतको भनाइ छ ।

संशोधन प्रस्तावलाई अन्तिम रूप दिन एमालेले प्रमुख सचेतक चक्र मल्लको संयोजकत्वमा कार्यदलसमेत गठन गरेको छ । कार्यदलले बजेटका विवादित तथा संशोधन आवश्यक ठानिएका विषयहरूको अध्ययन गरी प्रस्ताव तयार पार्ने बताइएको छ।

बैठकमा सहभागी प्रदेशसभा सदस्यहरूले बजेट निर्माण प्रक्रियामा पर्याप्त समन्वय नभएको, केही जिल्लालाई प्राथमिकता दिइएको तथा एमालेका प्रदेशसभा सदस्य र मन्त्रीहरूले अघि सारेका कतिपय योजनाहरू समेटिन नसकेको भन्दै असन्तुष्टि जनाएका छन् । बजेटका कार्यक्रम, योजना छनोट तथा स्रोत विनियोजनका विषयमा समेत समीक्षा गरिएको बताइएको छ।

सत्ता साझेदार दलभित्र नै बजेटलाई लिएर मतभेद देखिएको अवस्थामा एमालेको संशोधन प्रस्तावलाई राजनीतिक वृत्तमा चासोका साथ हेरिएको छ। सरकारको नेतृत्व गरिरहेको गठबन्धनभित्र बजेटप्रति असन्तुष्टि सार्वजनिक हुनु अर्थपूर्ण रूपमा हेरिएको छ ।

प्रदेश सरकारका आर्थिक मामिला मन्त्री विक्रमसिंह धामीले मध्यरातमा ३७ अर्ब ७० करोड रुपैयाँभन्दा बढीको बजेट प्रदेश सभामा प्रस्तुत गरेका थिए। बजेट सार्वजनिक भएलगत्तै सत्ता पक्षभित्रै असन्तुष्टिका स्वर सुनिन थालेका छन्