धनगढी, १७ वैशाख/ कैलालीको धनगढी उपमहानगरपालिका–५ हसनपुरस्थित एक होटलबाट जुवातास खेल्दै गरेका १० जनालाई प्रहरीले पक्राउ गरेको छ।

वडा प्रहरी कार्यालय धनगढीबाट प्रहरी निरीक्षक बलराम पाण्डेयको कमाण्डमा खटिएको टोलीले गोप्य सूचनाको आधारमा आज साँझ करिब ८ बजे उक्त स्थानमा छापा मारेको थियो। करिब ९ राती बजे रोहित होटलमा पुगेको टोलीले होटल सञ्चालक कालुराम चौधरीले सञ्चालन गरेको कोठाभित्र जुवातास खेलिरहेको अवस्थामा उनीहरूलाई फेला पारेको प्रहरीले जनाएको छ।

प्रहरीले घटनास्थलबाट नगद रु ५९ हजार २९० र एक गड्डी तास बरामद गरेको छ। पक्राउ परेकाहरूलाई आवश्यक कारबाहीका लागि जिल्ला प्रहरी कार्यालय कैलाली पठाइएको जनाइएको छ।

पक्राउ पर्नेहरूमा होटल सञ्चालक ४२ वर्षीय कालुराम चौधरीसहित बिरेन्द्र थापा (३८), रोहित खड्का (२४), कृस बम (२०), पदम ठकुल्ला (३३), अनिल चौधरी (२९), बिरु साउद (५१), टिकाराम खनाल (४१), रामकृष्ण चौधरी (४३) र विवेक साउद (१८) रहेका छन्।

उक्त स्थान वडा प्रहरी कार्यालय धनगढीबाट  उत्तरतर्फ पर्ने जनाइएको छ। प्रहरीले यस क्षेत्रमा जुवातास नियन्त्रणका लागि निगरानी बढाएको बताएको छ।