काठमाडौं, १० चैत / नेपाली कांग्रेसभित्र चुनावपछि देखिएको आन्तरिक विवादका बीच सुदूरपश्चिम र कर्णाली प्रदेशका सभापतिहरूको मौनता थप चासोको विषय बनेको छ। नयाँ केन्द्रीय समिति र पुरानो संस्थापन पक्षबीच टकराव बढिरहेका बेला यी दुई प्रदेशका नेतृत्व दुवै पक्षका बैठकबाट टाढा बसेका छन्।

फागुन २१ को प्रतिनिधिसभा निर्वाचनपछि केन्द्रीय कार्यालय सानेपामा गगन थापा नेतृत्वको नयाँ केन्द्रीय समितिको बैठक चलिरहँदा पुरानो संस्थापन पक्षले छुट्टै बैठक बस्ने तयारी गरिरहेको छ। यस्तो संवेदनशील अवस्थामा सातमध्ये पाँच प्रदेश सभापति भने नयाँ नेतृत्वको पक्षमा खुलेर उभिएका छन्।

तर कर्णाली प्रदेश सभापति ललितजंग शाही र सुदूरपश्चिम प्रदेश सभापति वीरबहादुर बलायर भने न नयाँ कार्यसमितिको बैठकमा सहभागी भएका छन्, न त संस्थापन पक्षको बैठकमै देखिएका छन्। उनीहरूको अनुपस्थितिले दुवै प्रदेशको धारणा अस्पष्ट बनेको छ।

राजनीतिक रूपमा महत्वपूर्ण मानिने यी दुई प्रदेशको नेतृत्व मौन रहँदा कांग्रेसभित्रको शक्ति सन्तुलन र आगामी रणनीतिमा समेत प्रभाव पर्ने विश्लेषण गरिएको छ। विशेष गरी सुदूरपश्चिम, जहाँ कांग्रेसको संगठनात्मक प्रभाव बलियो मानिन्छ, त्यहाँका सभापति बलायरको नदेखिएको सक्रियताले थप प्रश्न उठाएको छ।

यता अन्य प्रदेश सभापतिहरू भने क्रमशः नयाँ नेतृत्वतर्फ आकर्षित हुँदै गएका छन्। बागमती, मधेश, कोशी, गण्डकी र लुम्बिनीका सभापतिहरूले सार्वजनिक रूपमा नै गगन थापाको नेतृत्व स्वीकार्दै एकतामा जोड दिएका छन्।

पार्टीभित्रको विवाद समाधान गर्न संवादको आवश्यकता औंल्याइरहँदा कर्णाली र सुदूरपश्चिमका सभापतिहरूको मौनता तोडिने वा उनीहरू कुन धारमा उभिने भन्ने विषयले आगामी दिनमा कांग्रेसको दिशा निर्धारण गर्ने देखिन्छ।